Kandidati për Tiranën, Arlind Qori, ka akuzuar kryebashkiakun Erion Veliaj se po tenton të pengojë mbledhjen e firmave për kandidimin e Lëvizjes Bashkë, në Bashkinë e Tiranës.
Përmes një postimi në rrjete sociale, Qori shkruan se Veliaj po përdor policinë bashkiake për të ndaluar mbledhjen e firmave të qytetarëve.
Teksa ka ndarë me ndjekësit një foto nga ndërhyrja e Policisë Bashkiake, Qori shprehet se ky është një rast skandaloz, ndërsa shton se Edi Rama dhe Erion Veliaj e kanë shndërruar shtetin shqiptar në një shtet patatinash.
Postimi:
Sot Policia Bashkiake e Tiranës ka tentuar të pengojë mbledhjen e firmave për kandidimin e Lëvizjes BASHKË pikërisht në Bashkinë e Tiranës. Sipas ligjit, kërkesën për përdorimin e pak centimetrave katrorë në rrugën përballë Bibliotekës Kombëtare e kemi depozituar në bashki që përpara një jave. Ashtu si Agron Zhukri, i cili seancën e njohjes së partisë e ka lënë pas përfundimit të afatit të regjistrimit të partive në KQZ, edhe Erion Veliaj përgjigjen për kërkesën tonë mendon ta japë pas 14 majit. Ky rast është edhe më skandaloz sepse do të thotë t’i ndalosh paligjshmërisht një partie dhe kandidati rival mundësinë për të mbledhur firmat e qytetarëve për të të sfiduar në zgjedhje.
Po të mos ishin qesharake, të tilla orvatje të dëshpëruara do të ishin vërtet për të qarë me lebeti. Edi Rama dhe Erion Veliaj e kanë shndërruar shtetin shqiptar në një shtet patatinash, ku tekat e pushtetarëve janë më të rëndësishme se ligji. Në interes të tyre përdorin herë gjyqtarë e herë policë. Uroj që të mos vijë dita kur kundër nesh të përdorin edhe nëpunësit e postës.
