Për orë të tëra gjatë paradites së të Martës, Bashkia e Tiranës bllokoi qarkullimin e automjeteve në një prej arterieve kryesore që lidh rrugën “Myslym Shyri” me “Rrugën e Kavajës”.
Punonjësit e Policisë Bashkiake, të cilët u stacionuan në hyrje të rrugës “Mujo Ulqinaku”, deklaruan për banorët e zonës se bllokimi i rrugës po bëhej për shkak të disa punimeve publike të Bashkisë së Tiranës.
Të pyetur nga qytetarët, punonjësit e Policisë Bashkiake deklaruan se nuk e kishin të qartë se çfarë punimesh po bëheshin konkretisht dhe as se kur do të lirohej rruga.
Ata kishin marrë urdhër që të zhvendosnin lëvizjen e mjeteve në rrugica të tjera, të cilat përfundojnë shumë larg, pranë ish-“21 Dhjetorit”.
“Boldnews.al” mësoi se e vërteta ishte tërësisht ndryshe dhe se nuk po realizoheshin punë publike.
Policia Bashkiake bllokoi rrugën për shkak të punimeve në një pallat shumë-katësh në dalje të rrugicës, pranë Kishës Katolike, që po ndërtohet nga kompania “Agikons”, në pronësi të Gentian Sulës.
Pamjet e siguruara nga redaksia tregojnë se një mjet i rëndë (skrap) po punonte në hyrje të kantierit të ndërtimit, duke paralizuar tërësisht lëvizjen në aksin rrugor.
Ky zhvillim është dëshmia e radhës se bashkia e drejtuar nga Erion Veliaj ka vendosur prioritet interesin e kompanive të ndërtimit, duke rënduar gjithnjë e më shumë përditshmërinë e qytetarëve.
Tirana, sidomos gjatë qeverisjes së Erion Veliaj, është shndërruar në një kantier gjigand betoni dhe shumë-katëshish.
Veliaj, nëpërmjet mediave të joshura prej tij, kundërshton çdo qëndrim kritik për betonizimin e Tiranës, duke u justifikuar me nevojën në rritje të shqiptarëve për të blerë apartamente në kryeqytet.
