Deputeti i Partisë Demokratike, Oerd Bylykbashi ka kërkuar që mazhoranca socialiste të bashkëpunojnë për të ngritur një komision hetimor për skandalin “McGonigal” e cila ka implikuar edhe kryeministrin Edi Rama.
Nga foltorja e Kuvendit, Bylykbashi e quajti skandal pasi tha se ligji pezullohet vetëm nga Gjykata Kushtetuese.
“Ky grup parlamentar i shumicës po e varros përditë parlamentarizmin. Kërkojmë komision parlamentar hetimor për skandalin Rama-McGonigal. Është e papranueshme që Byroja e Kuvendit ka vendosur të pezullojë ligjin për komisionet hetimore. Këtë ligj mund ta pezullojë vetëm Gjykata Kushtetuese. Sot duhet që ky Parlament të hetojë në të drejtën e vet. Ka vendime të Gjykatës Kushtetuese. Ka madje edhe marrëveshje, kjo është turp, për zbatimin e vendimeve të Gjykatës Kushtetuese. E mbështeti edhe Parlamenti Europian ajo marrëveshje” tha Bylykbashi.
Por drejtuesja e seancës, Ermonela Felaj tha se ligji për komisionet hetimore është pezulluar, për shkak se po shqyrtohen ndryshimet në këtë ligj.
