Një drejtues në Policisë Rrugore të Tiranës dhe një efektiv janë arrestuar këtë të Enjte për veprën penale “Ushtrimi i ndikimit të paligjshëm ndaj personave që ushtrojnë funksione publike”.
Ata akuzohen se në një periudhë kohore disa mujore, kanë premtuar dhe siguruar qytetarë të ndryshëm, drejtpërdrejt apo mes personave të tjerë, që kundrejt përfitimeve monetare të parregullta, do t’ju kthenin para afatit të pezullimit lejet e drejtimit të pezulluara sipas sanksioneve të Kodit Rrugor të Republikës së Shqipërisë, që administroheshin në Zyrën e Kartotekës së OASH.
Në pranga janë vënë:
- Elio Picoki, me detyrë Shef Seksioni për Shërbimet Ekonomike dhe Personelin, në Komisariatin Rajonal të Policisë Rrugore Tiranë.
- Amarido Lika, me detyrë Trupë Shërbimi Nd/Specialist pranë Seksionit të Parandalimit dhe Sigurisë në Linjat jashtë qytetit, në Komisariatin e Policisë Rrugore Tiranë.
Gjykata e Posaçme e Shkallës së Parë Për Korrupsionin dhe Krimin e Organizuar, me kërkesë të SPAK, ka vendosur këtë të Enjte ndaj tyre, masën e sigurisë së arrestit me burg.
Masat janë ekzekutuar po sot nga Agjencia e Mbikëqyrjes Policore.
Sipas SPAK, në funksion të hetimeve të këtij procedimi penal të çelur vitin e kaluar, “janë përdorur mjete dhe metoda speciale hetimi të alternuara me mjetet apo metodat tradicionale të hetimit”.
