Dita e sotme pritet të prodhojë debate të forta mes opozitës dhe mazhorancës në sallën e Kuvendit por edhe jashtë saj pasi kreu i PD-së, Sali Berisha ka thirrur protestë përballë institucionit të ligjvënësve.
Kryeministri Edi Rama prej disa seancash mungon në sallën e Kuvendit, ndërsa opozita ka kërkuar që kreu i shtetit të dalë dhe të japë “llogari” për atë që e cilësojnë si skandali “McGonigal” ku dyshohet se është implikuar edhe Edi Rama në një aferë korruptive.
Në orë 17:00 kur është parashikuar protesta e opozitës por dhe nisja e seancës plenare, kreu i Qeverisë do të presë në zyrën e tij Kryeministrin e Bavarisë Markus Söder i cili zhvillon vizitë zyrtare në Shqipëri.
Sipas zyrës së shtypit pranë Kryeministrit, në përfundim të takimit dy kryeministrat do të mbajnë dhe një konferencë të përbashkët për shtyp, ku mund të ketë dhe ndonjë koment edhe lidhur me zhvillimet që do të prodhojë Kuvendi.
“Përshëndetje, Në orën 17:00 do të zhvillohet konferenca për shtyp e Kryeministrit Edi Rama dhe Kryeministrit të Bavarisë, Markus Söder i cili zhvillon vizitë zyrtare në Shqipëri. Konferenca do të mbahet te COD, në Kryeministri”, thuhet në njoftimin e zyrës së shtypit të Kryeministrisë.
Ndërkaq, pas këtij takimi, Rama nuk do të shkojë në parlament, por do të niset drejt Rinasit ku do të fluturojë për një vizitë në Dubai dhe në këtë mënyrë do t’i shpëtojë përballjes me protestuesit dhe deputetët demokratë.
