Kryetari i Partisë Demokratike, Sali Berisha, ka lëshuar akuza të forta ndaj Arben Rakipit dhe Fatmir Xhafajt, duke i cilësuar si “truri” pas reformave në drejtësi dhe territoriale.
Në një deklaratë të mbajtur gjatë një mbledhjeje të Grupit Parlamentar, Berisha ka vënë në dyshim integritetin e tyre dhe ka kërkuar përfshirjen e institucioneve ndërkombëtare në proceset reformuese.
Berisha e cilësoi Rakipin si “mafiozin më të madh në polici”, duke e akuzuar për lidhje me figura të dyshimta dhe përjashtim nga procesi i vettingut.
Ai e përshkroi si protektor të Altin Troplinit dhe autor të Kodit Penal, duke e lidhur me të kaluarën e policisë sekrete të regjimit komunist.
Sipas Berishës, reforma në drejtësi nuk mund të udhëhiqet nga figura të tilla, duke e cilësuar procesin si të manipuluar.
Ai paralajmëroi se çdo ligj do të analizohet me “lupë” nga Partia Demokratike, duke theksuar se nuk do të pranohet asnjë komision pa përfshirjen e ODHIR-it dhe ekspertëve nga Komisioni i Venecias.
Berisha i bëri thirrje institucioneve ndërkombëtare që të mos bazojnë qëndrimet e tyre në “mashtrime” dhe të angazhohen seriozisht në proceset reformuese.
Ai u shpreh se PD-ja është e hapur për zbatimin e rekomandimeve të tyre, por jo në bashkëpunim me figura që sipas tij kanë probleme të mëdha me drejtësinë.
“Të bëjë Arben Rakipi me Fatmirin reformën në drejtësi. Rakipi është mafiozi më i madh në polici. Ai është i përjashtuar nga vettingu, Ky protektori i Altin Troplinit dhe autori i Kodit, ish-bashkëpunëtor i policisë sekrete te Enver Hoxhës, që s’duhet të jetë në sistem.
Ky është truri me Xhafën i reformimeve. Pretendojnë për dy komisione. Asnjë komision, pa kongresin e komisioneve rajonale, për reformën territoriale, pa ODHIR-in, nuk marrin pjesë. Të vinë institucionet ndërkombëtare dhe është e gabuar që e bazojnë në një mashtrim qëndrimin e tyre.
Të vinë të marrin ODHIR-in dhe specialistë nga Venecia. Ne jemi të hapur të zbatojmë rekomandimet e tjera. Por me Fatmir Xhafën, Gjiknurin që është dhe duhet të ishte në burg prej kohësh, njeriut që i vjedhin nënës së tij 7 milionë euro. Shkoni shihni gjirin e Manastirlit si e kanë bërë me Ramën. Këta kanë si qëllim që të shkatërrojnë gjithçka.”, tha ai.
