Deputetja e Partisë Demokratike, Ina Zhupa, ka ngritur sërish shqetwsimin për mënyrën sesi funksionon Kuvendi i Shqipërisë nën drejtimin e mazhorancës, duke e cilësuar atë si një “noter të projektligjeve të qeverisë”.
Në një intervistë për SYRI TV, Zhupa akuzoi shumicën parlamentare për bllokimin sistematik të çdo nisme apo kërkese për debat nga opozita, në kundërshtim me rregulloren e Kuvendit dhe Kushtetutën.
“Kjo është një situatë që ka nisur që në fillim të kësaj legjislature. Edi Rama ka zgjedhur ta kthejë Kuvendin në një noter të vendimeve të qeverisë, duke mohuar rolin tonë si deputetë për të përfaqësuar interesin publik,” deklaroi Zhupa.
Sipas saj, çdo kërkesë e opozitës për debat rrëzohet automatikisht nga mazhoranca, pavarësisht mbështetjes në rregulloren parlamentare.
Ajo përmendi dy mocione të dorëzuara javën e kaluar — një për procesin e integrimit dhe një tjetër për dënimin e gjenocidit serb në Kosovë — të cilat u refuzuan pa diskutim në Konferencën e Kryetarëve.
Zhupa njoftoi se këtë javë opozita ka propozuar një mocion të ri për krijimin e një komisioni të posaçëm parlamentar që të hetojë fondet IPARD të Bashkimit Evropian, të cilat sipas saj janë abuzuar dhe aktualisht të pezulluara për Shqipërinë.
“Fondet IPARD janë vjedhur. Duhet një skaner i plotë për të rikuperuar ato që janë tjetërsuar ndër vite nga individë të lidhur me grupe kriminale,” tha Zhupa, duke kërkuar transparencë dhe përgjegjësi institucionale.
