Tensione për disa momente mes protestuesëve dhe efektivëve të Policisë së Shtetit të mbledhur jashtë Kuvendit të Shqipërisë.
Protestuesit kanë nisur të hedhin mjete pirroteknike, ndërsa kanë munduar të çajnë kordonin policor.
Momentet e tensionit kaluan dhe rotesta vijon e qetë.
***
LIVE – Nis protesta para parlamentit, deputetet e PD nuk lejohen të futen në seancë
Mbështetës së opozitës janë grumbulluar para parlamentit duke iu përgjigjur thirrjes për protestë të kryetarit të PD-së Sali Berisha.
“Demokracisë i dalim Zot”, “Edi FBI is watching you”, “Edi is a brand name … in the FBI files”, ishin disa nga mbishkrimet në pankartat e shpalosura nga opozita.
Ndërkohë, tensione ka pasur në derën hyrëse të Kuvendit, ku disa deputetë të Partisë Demokratike nuk u lejuan nga punonjësit e sigurisë së Kuvendit ti bashkohen seancës plenare.
Këta të fundit argumentuan se po zbatojnë vendimin e Sekretariatit të Etikës, që më 8 Shkurt, vendosi përjashtimin për 10 ditë nga parlamenti dhe komisionet për 8 deputete demokratë.
Disa prej tyre, si Albana Vokshi, Luçiano Boçi, Luan Baçi, Bledion Nallbati, Ina Zhupa dhe Tritan Shehu tentuan të futen në parlament, por nuk u lejuan nga punonjësit e sigurisë.
“Ky është vendimi i gjykatës politike me pushkatim drejtuar nga Rama me mëkëmbësen e tij Lindita Nikolla”, u shpreh Boçi.
Deputetët e përjashtuar iu bashkuan protestës para parlamentit. “Do ti bashkohemi parlamentit të popullit”, tha Albana Vokshi.
Ndërkohë, në Kuvend u ndërpre energjia elektrike për disa momente dhe për këtë shkak seanca u ndërpre.
