Nënkryetar i Partisë së Lirisë, Endrit Braimllari ka hedhur akuza të forta ndaj kryebashkiakut të Tiranës, Erion Veliajt për të cilin ka thënë se duhet të ishte në burg për shkak të abuzimit të fondeve publike.
Duke iu referuar investigimit të “Boldnews.al”, Braimllari thekson se Veliaj ka shpenzuar në mënyrë abuzive të paktën 1 miliard lekë nga taksapaguesit shqiptar për kontenierin teknologjik me qëllim riciklimin e mbetjeve por që në realitet ky proces nuk ndodh.
Reagimi nga Endrit Braimllari:
“Erion Veliaj sot duhet të ishte përpara drejtësisë për abuzim me fondet publike.
Minimumi 1 Miliard lekë abuzime për kontinieret teknologjik për të ndare sipas llojit të mbetjeve me qëllim lehtësimin në riciklim.
Tani është e qartë për opinionin publik, që pas investigimit disa mujor të Monika Kryemadhit që sensibilizoi qytetarët, nuk ka ndarje të plehrave, por në Sharrë përfundojnë tek i njëjti landfill dhe ky proces nuk ndodh.
Vetëm ky fakt do të mjaftoje për të çuar para drejtësisë Erion Veliaj”, shkruan Braimllari.
- Tenderat 900 mijë euro
Në Nëntor të vitit 2021, kompania “Eco Tirana”, ku Bashkia e kryeqytetit zotëron 51 përqind të aksioneve, shpalli tenderi me vlerë 754 mijë euro për blerje sistemi të ri për mbledhjen e mbeturinave, të përbërë nga kontenierë mbitokë e nëntokë.
Sipas dokumentave të tenderit, të konsultuar nga “Boldnews.al”, rezulton se “Eco Tirana” ishte e interesuar për blerjen e 12 kontenierëve parafabrikat me vëllim 5 metra kub, për grumbullimin e veçuar të ambalazheve (plastikë, kanoçe, qelq, letër, karton).
Rreth 4 muaj më pas, u shpall fituesi i tenderit. Kompania fituese ishte italiania “Nord Engineering” srl, e cila paraqiti ofertën 750 mijë euro ose vetëm 4 mijë euro më pak se sa fondi limit.
- Plehrat nuk trajtohen veçmas
Në mes të javës së kaluar, deputetja Monika Kryemadhi publikoi pamje me dron, të cilat kishin filmuar mënyrën se si trajtohen mbeturinat në landfillin privat të Tiranës.
Në video tregohet se koncesionari, jo vetëm që nuk inceneron mbetjet urbane, për të cilat paguhet 29 euro për ton plehrash të depozituara, por as nuk bën përpjekjen më të vogël për diferencimin e tyre sipas llojit.
Qeveria Shqiptare, nëpërmjet Ministrisë së Mjedisit dhe kompania off-shore “Integrated Energy BV” nënshkruan në shtator të vitit 2017 një kontratë për ndërtimin dhe operimin e landfillit dhe inceneratorit të Sharrës në Tiranë.
Kosto koncesionare llogaritej në vlerën 128 milionë euro. Kompania private mori përsipër që të ndërtonte me të ardhurat e saj landfillin dhe impiantin e djegies së mbeturinave. Në këmbim do të paguhej nga qeveria shqiptare, nëpërmjet Bashkisë së Tiranës, 29 euro për ton mbeturina.
Në këtë çmim përfshihej depozitimi i mbetjeve, diferencimi i tyre, kapsulimi dhe më tej incenerimi.
Pamjet e publikuara nga Kryemadhi dëshmuan se nuk ka as diferencim të mbetjeve dhe as incenerim të tyre.
