Objektet e NASA-s pranë Madridit janë prekur nga zjarret që kanë përfshirë periferitë e kryeqytetit spanjoll, duke detyruar evakuimin e stafit si masë sigurie.
Një zëdhënës i agjencisë amerikane konfirmoi për AFP se flakët “kaluan përmes” Kompleksit të Komunikimeve Hapësinore të Madridit (MDSCC), një qendër strategjike që luan rol kyç në komunikimin me misionet që eksplorojnë hapësirën e thellë.
Sipas NASA-s, evakuimi i objektit u krye në kohë dhe nuk raportohet për persona të lënduar. Agjencia bëri të ditur se dëmet e mundshme do të vlerësohen sapo kushtet e sigurisë ta lejojnë.
Autoritetet spanjolle dhe ekipet e emergjencës vijojnë përpjekjet për të vënë nën kontroll zjarret, të cilat kanë përfshirë disa zona në periferi të Madridit dhe kanë shkaktuar shqetësime për infrastrukturën kritike.
