Familjarë, të afërm, miq dhe banorë të zonës do t’i japin sot lamtumirën e fundit Kosta dhe Bejlere Plakës, çifti që humbi jetën në tragjedinë e ndodhur një ditë më parë në fshatin Vidhishtë, në bashkinë e Roskovecit.
Ceremonia mortore do të zhvillohet në orën 11:00, ku çifti do të përcillet për në banesën e fundit mes dhimbjes së familjarëve dhe tronditjes që ka përfshirë të gjithë komunitetin.
Kryefamiljari Kosta Plaka, 58 vjeç, humbi jetën në vendngjarje pasi u qëllua me armë gjahu nga Refik Buzi, ndërsa bashkëshortja e tij, Bejlere Plaka, 55 vjeçe, mbeti e plagosur rëndë dhe ndërroi jetë disa orë më vonë në spital.
Ngjarja e rëndë ndodhi mëngjesin e 24 korrikut, kur Refik Buzi, ish-i fejuari i vajzës së çiftit, dyshohet se shkoi në banesën e familjes Plaka në Vidhishtë. Ai vrau Kosta Plakën, plagosi rëndë bashkëshorten e tij dhe më pas mori me vete ish-të fejuarën, Rozalinda Plaka, e cila u lirua pas disa orësh gjatë një operacioni të forcave speciale RENEA.
Pas disa orësh negociatash me policinë, autori i dyshuar, Refik Buzi, dyshohet se i dha fund jetës brenda automjetit me të cilin ishte rrethuar nga forcat speciale në zonën e Kurjanit.
Tragjedia ka tronditur banorët e Vidhishtës dhe mbarë opinionin publik, ndërsa ceremonia mortore e Refik Buzit pritet të zhvillohet ditën e nesërme.
