Ditën e sotme do të mbahej seanca gjyqësore ndaj ish-ministrit të Brendshëm, Saimir Tahiri, i cili është dënuar me 3 vite e 4 muaj burg për përfshirje në trafikun e drogës.
Tahiri kërkon që t’i njihen ditët e paraburgimit. Më herët ishte kërkuar përjashtimi i gjyqtarit Elis Dine, i cili është zëvendësuar nga Elton Frashëri.
Shkak për shtyrjen e seancës është bërë Frashëri i cili kërkon kohën e mjaftueshme për t’u njohur me përmbajtjen e dosjes gjyqësore.
Gjithashtu edhe në nisje të seancës, Tahiri nuk ka qenë i pranishëm në sallën e gjyqit dhe trupi gjykues pritet të marrë një vendim për një tjetër datë për seancën gjyqësore. Seanca e radhës do të mbahet me 17 Janar.
Kujtojmë që pak ditë më parë është dënuar me 8 vite e 8 muaj burg Hekuran Marku, truproja e Tahirit i akuzuar për trafikim narkotikësh në kuadër të grupit të strukturuar kriminal.
Prokuroria kërkoi 12 vite heqje lirie për Markun, por ai përfitoi nga ulja e dënimit me 1/3 për shkak të gjykimi të shkurtuar.
Ndaj tij nisën hetimet si pjesë e një grupi kriminal, bashkë me ish-truprojën tjetër të Saimir Tahirit, Agustin Dedën për të cilin ende zvarriten procedurat e ekstradimit.
Më 1 prill Marku u ekstradua nga Gjermania, për tu përballur me GJKKO me akuzat e ngritura nga SPAK. Marku e Deda akuzohen se janë përfshirë në trafikun e drogës të zbuluar në kuadër të hetimeve nga operacioni i koduar “Shpirti”.
