Ambasadorja e SHBA në Tiranë, Yuri Kim ka reaguar sërish për rëndësinë që ka zgjedhja e drejtuesit të ri të SPAK-ut.
Gjatë një postimi në rrjetet sociale, Kim thotë se procesi nuk duhet të ndikohet nga ata që kanë interes për të manipuluar hetimet. Ndër të tjera ambasadoja amerikane thotë se SHBA do të monitorojë nga afër procesin e përzgjedhjes së SPAK-ut.
Postimi i plotë i Yuri Kim:
“Javën e fundit jemi takuar me çdo anëtar të Këshillit të Lartë të Prokurorisë (KLP) për të nënvizuar rëndësinë e zgjedhjes së një drejtuesi të ri të SPAK-ut, i cili – pa frikë e favor – do të intensifikojë luftën kundër korrupsionit dhe krimit të organizuar.
Procesi i përzgjedhjes nuk duhet të ndikohet nga ata që kanë interes për të kufizuar ose manipuluar hetimet. Ky është thelbi i reformës në drejtësi: drejtësia duhet të jetë e verbër ndaj pushtetit, prokurorët dhe gjyqtarët duhet të jenë të gjithë të barabartë përpara ligjit, institucionet duhet të jenë të pavarura.
Reforma në drejtësi nuk është vetëm një kërkesë për anëtarësimin në BE; është kërkesa e drejtë e popullit shqiptar. SHBA do të qëndrojë gjithmonë me popullin e Shqipërisë. Ne do të vazhdojmë të mbështesim me vendosmëri zbatimin e reformës në drejtësi. Kjo nuk do të ndryshojë. Ne do të monitorojmë nga afër procesin e përzgjedhjes së SPAK-ut për të siguruar që reforma në drejtësi të ecë përpara”, shkruan Kim.
Ambasadorja e SHBA, Yuri Kim iu përgjigj diskutimit lidhur me mandatin e saj, duke theksuar se do të jetë ‘edhe ca më gjatë në Shqipëri’. Ditët e fundit flitet gjegjësisht në media se mes Kim dhe Ramës krisja ka ardhur pasi palët kanë preferenca të ndryshme lidhur me kreun e ri të SPAK.
