Nis me tensione protesta e opozitës në kryeqytet. Kreu i Partisë Demokratike, Sali Berisha, teksa marshonte në Bulevardin “Dëshmorët e Kombit” është goditur me grusht nga një person.
Në këtë moment, kanë ndërhyrë truprojat e kreut të PD-së dhe protestues, të cilët janë përleshur me agresorin, i cili u dërgua në selinë blu.
Prej aty, ky i fundit u shoqërua më pas nga policia dhe më tej u transportua në spitalin e Traumës.
Ndërkohë, kreu i PD-së, me fytyrën e gjakosur, u ngjit në podiumin e protestës dhe mbajti një fjalim të shkurtër pas incidentit.
“Populli i opozitës, populli i fitores! Poshtë Edi Rama, poshtë kriminelët! Ne do të triumfojmë! Rroftë opozita shqiptare! Nderim ju që jeni sot këtu së bashku për të protestuar kundër regjimit të horrave dhe kriminelëve. Nder përjetë, popullit protestues. Faleminderit shumë”, tha Berisha.
Agresori u identifikua si Gert Shehu, i datëlindjes 1991, banues në kryeqytet, por me origjinë nga Tepelena.
