Në një konferencë të përbashkët me Presidenten e KE, Ursula Von der Leyen dhe Edi Ramën nga Tirana, presidenti i Këshillit Europian Charles Michel i ka listuar problemet kryesore dhe reale të cilat duhet të trajtojë qeveria e kryeministrit shqiptar.
Michel ia tha në sy Ramës se Shqipëria duhet të avancojë me reformat për shtetin e së drejtës dhe të luftojë korrupsionin në mënyrë që të bëjë progres të mëtejshëm në procesin e integrimit të vendit në BE.
“Ne shkruajmë historinë sepse për herë të parë kjo mbledhje u organizua në rajonin e Ballkanit Perëndimor. Për herë të parë liderët e BE dhe Ballkani Perëndimor janë në të njëjtën tryezë. Kam pak emocion që jam në këtë tribunë në Tiranë. E ardhmja e fëmijëve tanë do të jetë më e sigurt me Ballkanin Perëndimor në Europë. Të gjithë kemi detyrat tona. Ka pritshmëri që reformat në shtetin e së drejtës, reforma në drejtësi dhe lufta kundër korrupsionit të avancojë. Nga ana tjetër Bashkimi Evropian duhet të forcojë tregun e përbashkët. Një prej këtyre është edhe marrëveshja për roaming. Në vitin 2027 parashikohet të hiqen plotësisht detyrimet e roaming”, tha ai.
Emigracioni ishte problematika e radhës për të cilën Michel tha se është diskutuar në samit dhe theksoi se duhet të ndërmerren politika të përbashkëta me BE për ta menaxhuar sa më mirë këtë situatë.
“Është shumë e rëndësishme të kemi një paketë financiare për të ndihmuar vendet e rajonit për tu përballur me këtë situatë. Duhet të them disa fjalë për emigracionin. Është një temë sfiduese. Ne jemi përballur me rritjen e shifrave dhe ky bashkëpunim me Ballkanin Perëndimor është i nevojshëm për të gjithë ne. Duhet të merren vendime shtesë dhe të bëjmë progres të mëtejshëm për të menaxhuar së bashku këtë situatë”, tha ai.
