Nga Boldnews.al
Në një dalje publike, kryeministri Edi Rama “kritikoi” kryetarin e Bashkisë së Tiranës, Erion Veliaj se “i ke shumë të vogla”. Ai iu referua pemëve të mbjella nga Lali Eri, ndërsa “lavdëroi” kryetarin e Bashkisë së Kamzës, Rakip Suli, se ishte më efikas.
Megjithatë, humori i tij ishte më shumë për të përfolur investimet apo propagandën boshe të mbjelljes së pemëve, ku në fakt vëmendja e bashkive s’kanë qenë pemët por ndërtimet shumë katëshe, e madje edhe betonizimi. Por, pa kaluar shumë kohë nga kjo “kritikë”, Lali Eri ka vënë në lëvizje “ushtarët”, teksa ka futur direkt në planifikim tenderimin e blerjeve të pemëve të mëdha.
Sipas dokumenteve që disponon “BoldNews”, Agjencia e Parqeve dhe Rekreacionit, një institucion në varësi direkte të Bashkisë së Tiranës, ka hapur një tender me objekt “blerje pemë shumë vjeçare”. Fondi për këtë tender është 200.000.000 lekë pa TVSH ose rreth 2 milionë euro me TVSH.
Një shumë e majmë, ndërsa pritet që tenderi të bëhen në muajin dhjetor. Bëhet fjalë për blerje pemë të mëdha dhe jo nga ato të “voglat” e Lali Erit, për të cilat u “kritikua” nga Edi Rama se “i mbjell tre herë”.
Ndërkohë, ky tender vjen disa ditë pas një tjetër procedure të bërë nga Drejtoria e Përgjithshme e Pastrimit dhe Gjelbërimit në Tiranë, i cili ka hapur një tender për blerje pemësh. Objekti i tenderit është “blerje pemë dekorative për pyllin orbital dhe në zona të ndryshme të Tiranës”. Fondi për këtë procedurë është plot 300.000.000 lekë, ose me TVSH rreth 3 milionë euro.
Në ecejaket e zakonshme, Edi Rama mblodhi disa ditë më parë pas vetes Erion Veliajn, Rakip Sulin dhe Lindita Nikollën. Ata shëtitën në disa zona të Kamzës, ndërsa shkëmbyen edhe batuta me njëri tjetrin.
Veliaj: Do i japim edhe ne ndonjë kontribut me pemë se kemi stok të madh.
Rama: Ti i ke po i ke të vogla shumë.
Veliaj: Unë i kam për marshalla për atë punë.
Rama: Kurse ky i ka pemë tamam. Ti i ke nga ato që mbillen tre here.
Veliaj- Sulit: Lerë mos u provoko nga ky.
Suli: Pemët m’i ka sjellë të mëdhaja lali Eri.
Organizimi i kuruar deri në detaje, ishte kujdesur të poziciononte disa të rinj që pikturonin peizazhin e liqenit të Paskuqanit. Por, menjëherë pas kësaj “kritike”, Lali Eri do të shpenzojë plot 5 milionë euro për pemë të vogla dhe të mëdha. Të lutem kryeministër, mos e “kritiko” më Veliajn!
