Lëvizja universitare ka zhvilluar ditën e sotme një forum me studentë e pedagogë në vazhdim të protestës dhe bojkotit të tyre pasi qeveria nuk ka plotësuar kërkesat e tyre që lidhen kryesisht me rritjen e pagave për ta dhe stafin ndihmës si edhe për rritjen e financimit të kërkimit shkencor.
Pedagogia Enkelejda Olldashi e Fakultetit të Drejtësisë në Tiranë, që ishte edhe përfaqësuese e sindikatës, është shprehur me ironi se nuk e kishte menduar asnjëherë që do të përfundonin si Aristoteli duke dhënë mësim në qiell të hapur.
Pedagogia ka kërkuar që së bashku, i gjithë stafi akademik të ketë një kontratë kolektive pune.
“Sot jemi mbledhur dhe nuk e kisha menduar kurrë 27 vite më parë kur u bëmë pjesë e këtij universiteti. Nuk do e kisha menduar që do të kishim përfunduar si Aristoteli që jepte mësim në qiell të hapur. Ne nuk jemi politikanë. Nuk kemi nevojë të kemi media me vete për të treguar pastërtinë e shpirtit tonë.
Ne nesër duhet të kemi një kontratë kolektive pune. Ajo është një nga detyrimet që duhet të ishte realizuar kohë më parë. Kjo do të standartizonte ato marrëdhënie dhe ato problematika për të cilat ne jemi sot këtu”- tha pedagogia.
Pedagogia Enkelejda Olldashi shtoi se pedagogët sot nuk duhet të ndihen sikur janë të punësuar, pasi punëdhënësit e tyre sipas saj janë vetëm studentët e jo drejtuesit e institucioneve.
“Ata që janë gjithmonë të përkohshëm në një marrëdhënie pune janë punëdhënësit, ne jemi të përhershëm. Ne ofrojmë një shërbim, nuk i konsideroj më drejtuesit punëdhënës, vetëm studentët. Ata që na japin punë përditë janë studentët tanë, me ata i kemi marrëdhëniet e punës. Duhet të artikulojmë një platformë dhe më pas të negociojmë një marrëveshje. Ne duhet të ndihemi sikur nuk jemi të punësuar sot. Shumë profesorë na janë bashkuar, janë ata që dalin dhe kanë kurajë të dalin përballë”, u shpreh Olldashi.
