Sekretari i Përgjithshëm i Partisë së Lirisë, Tedi Blushi me anë të një postimi në FB, shkruan se vrasësit me uniformë të Policisë së Shtetit po u marrin jetën të rinjve shqiptarë.
Duke iu referuar vdekjes së 32-vjeçarit në Komisariat, por edhe vrasjeve të Klodian Rashës, Ilvi Meta dhe Jonada Avdia, Blushi shkruan se këto ngjarje tragjike nuk do të jenë të fundit sa kohë në pushtet të jetë Edi Rama, Bledi Çuçi dhe falangat e tyre të inkriminuara në Policinë e Shtetit.
“Katër viktima në ndërgjegjen e Edi Ramës! Fund vrasjeve të të rinjve nga Policia e Shtetit! Vrasësit me uniformë të Policisë së Shtetit po u marrin jetën të rinjve shqiptarë në rrugë, në plazhe dhe në ambientet e Komisariateve.Këto ngjarje tragjike dhe tronditëse nuk do të jenë të fundit sa kohë në pushtet të jetë Edi Rama, Bledi Çuçi dhe falangat e tyre të inkriminuara në Policinë e Shtetit.”, shkruan Blushi.
Po ashtu Blushi ka bërë thirrje që të gjithë të bashkohen te protesta që do të zhvillohet mbrëmjen e sotme përpara Ministrisë së Brendshme.
“Sot, e premte, në ora 20:00, të gjithë në protestë para Ministrisë së Brendshme!”, shkruan Blushi.
