Avokati i njohur Asllan Dogjani, pritet të jetë një ndër kandidatët për primaret që do të zhvillojë Partia Demokratike për bashkinë e Kamzës.
Fillimisht, ky njoftim u shpërnda në rrjetet sociale. Më tej, avokati Dogjani e konfirmoi se do të jetë pjesë e primareve në një bisedë telefonike me “Boldnews.al”.
Dogjani vjen nga radhët e Policisë së Shtetit ku ka mbajtur detyra të rëndësishme deri në nivel Drejtor Qarku. Gjithashtu ai ka qenë më herët pjesë e politikës aktive duke u zgjedhur deputet i Kukësit, në zgjedhjet e përgjithshme të vitit 2009.
Asllan Dogjani ka qënë pjesë aktive e protestave të Partisë Demokratike, në vitet e opozitës kundër qeverisë së Edi Ramës.
Lidershipi i atëhershëm i PD-së, i drejtuar nga Lulzim Basha, nuk e përfshiu Asllan Dogjanin në listën e kandidatëve për deputetë, në zgjedhjet e përgjithshme të vitit 2017, megjithëse rezultonte një prej emrave me mbështetje të fuqishme në radhët e demokratëve.
Gjatë viteve të fundit, Asllan Dogjani ka ushtruar aktivitetin e tij profesional si avokat, megjithëse nuk është shkëputur asnjëherë nga aktiviteti politik dhe bashkëpunimi me qytetarët, sidomos ata të zonës së Kamzës.
Në zgjedhjet e përgjithshme të vitit 2021 Dogjani mori mbi 5 mijë vota preferenciale si kandidat i opozitës për deputet në qarkun e Tiranës.
Me rikthimin e Sali Berishës në krye të opozitës u vendos që përcaktimi i kandidatëve për bashkitë e vendit do të bëhet nëpërmjet procesit të primareve ku pritet të votojnë anëtarë dhe simpatizantë të Partisë Demokratike.
Kjo hapësirë i ka dhënë mundësinë Dogjanit t’u drejtohet mbështetësve të opozitës për të kërkuar mbështetjen e tyre për të fituar, së pari garën brenda opozitës dhe, më tej, përballë kandidatit të Edi Ramës në bashkinë e Kamzës.
Dogjani duket se ka mbështetje të madhe qytetare dhe kjo dallohet qartësisht nga reagimet në rrjete sociale, sapo u bë publik fakti që ai pritet të përfshihet në primaret, nga ku do të dalë kandidati zyrtar i Partisë Demokratike që do të garojë për Bashkinë e Kamzës.
Arsimimi i tij përfshin edukimin nga Universiteti i Tiranës deri në Toronto, Kanada, duke e bërë një nga kandidatët më të spikatur të opozitës në rang vendi./BN
