Dy persona janë vënë në pranga në Fier, pasi u kapën në ambientet e një lokali duke vënë baste sprtive nëpërmjet telefonave. Të arrestuarit janë pronari i lokalit 42-vjeçari i identifikuar me inicialet D.B dhe një 19-vjeçar i identifikuar me inicialet O.M, të dy banues në Fier.
“Specialistët e Seksionit për Hetimin e Krimeve të Komisariatit të Policisë Fier, në vijim të kontrolleve në ambiente të ndryshme, në kuadër të planit operacional kombëtar “Fati i lojërave”, kanë evidentuar dhe goditur 1 rast tjetër të vënies së basteve sportive, nëpërmjet aparateve celulare.
Gjatë kontrollit në ambientet e një lokali në lagjen “Apollonia”, Fier, pronari i lokalit, shtetasi D. B. dhe shtetasi O. M., u kapën në flagrancë duke vënë baste sportive, nëpërmjet celularit. Në përfundim të veprimeve, shtetasit D. B., 42 vjeç dhe O. M., 19 vjeç, të dy banues në Fier, u arrestuan në flagrancë, për veprën penale “Organizimi ose ushtrimi i veprimtarive të lojërave të fatit në kundërshtim me ligjin”- njofton policia.
Materialet procedurale i kaluan Prokurorisë pranë Gyjkatës së Rrethit Gjyqësor Fier, për veprime të mëtejshme.
