Emanuel Rroku, 23-vjeçari shqiptar, mbeti i vrarë të premten në Itali jashtë një lokali pas një sherri me një bashkëkombas të tij.
Ngjarja e rëndë ndodhi mbrëmjen e së premtes, teksa shqiptarët po festonin në një lokal. Plumbi ishte fatal për të riun 23-vjeçar Emanuel Rroku, i cili kishte shkuar vetëm 3 vjeç në Itali. Autor i kësaj ngjarjeje të rëndë është 34-vjeçari Rigels Gjinaj, i cili u arrestua.
Autori 34-vjeçar i vrasjes ndodhet ende në spital në gjendje të rëndë pasi u dhunua fizikisht nga miqtë e të riut shqiptar që humbi jetën, Emanuel Rroku.
34-vjeçari, gjithashtu me origjinë shqiptare, ruhet në spital nga karabinierët, të cilët po hetojnë ende për ngjarjen e ndodhur në lokalin në via komunale Allea.
Hetimi po vijon me marrjen në pyetje të miqve të viktimës. Një hetim që kërkon të sqarojë anët e errëta të historisë që deri më tani mbeten mister. Para së gjithash, pse 34-vjeçari shqiptar që jeton në Milano, ishte në Turbigo pikërisht në atë klub dhe në atë mbrëmje.
Së dyti, nëse sherri shpërtheu vërtet pas ngacmimit të një gruaje të re apo nëse kishte hesape të hapura mes burrit dhe grupit të shqiptarëve.
Mbetet për t’u kuptuar gjithashtu se përse shqiptari kishte një pistoletë të kalibrit 6.35 mes njerëzve në një vend publik.
Një sërë pyetjesh që kërkojnë përgjigje të cilat mund të lehtësojnë apo rëndojnë përgjegjësinë e 34-vjeçarit shqiptar, i cili pasi vrau Rrokun, u rrah nga grupi i shqiptarëve dhe ndodhet në gjendje kritike për jetën.
A qëlloi 34-vjeçari për tu mbrojtur nga sulmi apo synimi i tij ishte vrasja e 23-vjeçarit?
