Polonia ka raportuar për një çarje të një tubacioni nafte që transporton karburant nga Rusia për në Gjermani.
Operatori polak PERN ka thënë se zbuloi një rrjedhje në seksionin e gazsjellësit Druzhba, i cili furnizon Gjermaninë me naftë ruse.
Incidenti u evidentua mbrëmjen e së enjtes nga sistemet automatike në një nga dy tubacionet rreth 70 kilometra nga qyteti Pllock në Poloninë qendrore.
Sipas operatorit polak, shkaqet e incidentit nuk dihen duke shtuar se stafi i tyre dhe zjarrfikësit ndodhen në vendin e ngjarjes për të siguruar zonën.
Zyrtari më i lartë polak i ngarkuar për infrastrukturën energjetike tha se nuk ka arsye për të dyshuar për një akt sabotimi dhe se mund të kemi të bëjmë me një dëmtim aksidental.
Tubacioni Druzhba është një nga rrjetet më të mëdha të transportit të naftës në botë, që përfshin rreth 4,000 km dhe sjell naftë nga Rusia në Ukrainë, Bjellorusi, Poloni, Hungari, Sllovaki, Republikën Çeke, Austri dhe Gjermani.
