Sekretari i Përgjithshëm i Partisë së Lirisë, Tedi Blushi në një postim në FB, ka denoncuar një tender të shpallur nga Ministria e Financave që sipas tij ka për qëllim për të blerë heshtjen e mediave. Ai shton se tenderi me vlerë 380 mijë euro është i barabartë me pagën e 364 profesorëve.
“Në kulmin e krizës ekonomike dhe të rritjes abuzive të çmimeve, kur pedagogët dhe profesorët në të gjithë vendin janë ngritur në protestë për rritjen e pagave të tyre, Ministria e Financave shpall tender me vlerë 380 mijë euro për “shërbime propagande”. (37.500.000 lekë + TVSH) Ky prokurim publik krejtësisht i panevojshëm, që ka për qëllim të qartë blerjen e heshtjes së mediave për skandalet e pafundme të Qeverisë, rrëzon përtokë pretendimin e gënjeshtërt të Edi Ramës dhe Delina Ibrahimaj se Buxheti i Shtetit nuk ka fonde për rritjen e pagave të profesorëve dhe pedagogëve”, shkruan Blushi.
Ai shkruan se shpërdorimi i 380 mijë euro për propagandë mediatike është një krim i shëmtuar.
“Të shpërdorosh 380 mijë euro për propagandë mediatike në kurriz të taksapaguesve shqiptarë, veçanërisht të 67% të popullsisë që jeton me të ardhura më pak apo deri në 5.5 dollarë në ditë, është një krim i shëmtuar, që nxjerr zbuluar fytyrën e vërtetë të babëzisë, hajdutërisë dhe paligjshmërisë të kësaj Qeverie. Tenderi 380 mijë euro, baraz me rrogën e 364 profesorëve, (paga mujore e një profesori është rreth 1043 euro në muaj) duhet anuluar menjëherë!”, vazhdon Blushi.
Blushi vijon duke thënë se shpenzimet për “makiazhin” dhe kurimin e fytyrës së urryer të Qeverisë nuk e shpëtojnë dot Edi Ramën dhe ministrat e tij nga llogaridhënia!
“Kaloni këtë fond dhe fonde të tjera tenderash të panevojshëm, që do t’i denoncojmë një për një, për plotësimin e kërkesave të drejta dhe plotësisht të realizueshme të pedagogëve!
Shpenzimet e turpshme për “makiazhin” dhe kurimin e fytyrës së urryer të Qeverisë nuk e shpëtojnë dot Edi Ramën dhe ministrat e tij nga llogaridhënia!
Për çdo abuzim dhe çdo qindarkë të vjedhur do të përgjigjen para popullit dhe drejtësisë”, perfundon shkrimi i Blushit.
Më herët për skandalin ka raportuar dhe BoldNews, ku sipas dokumenteve Ministria e Financave ka hapur një tender me procedurë “shërbim konsulence”. Bëhet fjalë për tenderin me objekt “fushatë mediatike për ndryshime ligjore në fushën fiskale”. Më tej shkruhet se paratë do të jepen për “shërbime të fushatës reklamuese”.
