Numri 2 i PD-së, Flamur Noka, në një interviste për emisionin “Pa Censurë” në RTSH me gazetaren Elona Meço, është pyetur rreth bashkimit të PD dhe si do të bëhet i mundur ky bashkim para zgjedhjeve. Sekretari i Përgjithshëm ka treguar rrugën e vetme drejt bashkimit dhe cilat janë pengesat. Noka, e cilëson një pengesë zvarritjen e çështjes gjyqësore që zyrtarizon kush e a drejtimin e forcës më të madhe në opozitë.
“Zgjidhja e çështjes do t’i jepte avantazh shumë të madh PD dhe opizitës. Kush po mban pneg vulën, logon dhe këtë vendim për t’i dhënë zgjidhje ligjore çështjes? Edi Rama. Pse? Për të mbajtur regjimin e tij në këmbë, për të përçarë PD.”- u shpreh Sekretari i Përgjithshëm i PD, Flamur Noka, në emisionin “Pa Censurë” në RTSH.
Numri dy i PD beson se po të ishin të bashkuar dhe me pjesën tjetër të grupit parlamentar, beteja do të ishte më e lehtë. Por ai beson gjithashtu se ka indidividë brenda grupit tjetër që bëjnë gjithçka për të penguar bashkimin e partisë me të gjithë grupin parlamentar. Për këtë, Flamur Noka thotë edhe emra.
Intervista
Flamur Noka: Ka indidividë që bëjnë gjithçka për të mbajtur peng deputetët për të mos iu bindur vullnetit të zgjedhësve të tyre. E them me dhimbje këtë, sepse do të doja që të gjithë kolegët të ishin pjesë esenciale e e betejës me Edi Ramën. Them me dhimbje, sepse shoh kolegë që shndërrohen në marioneta të Edi Ramës. Ky është një grup i vogël që vazhdon agjendën e Lulzim Bashës.
Elona Meço: Zoti Alibeaj më ka pohuar të kundërtën. Cila është agjenda e Lulzim Bashës sipas jush?
Flamur Noka: T’i shërbejë Edi Ramës dhe kurrë Partisë Demokratike. Koha e ka vërtetuar këtë. Keni parë ju të vijnë në seli Enkelejdi, Gazi dhe Jorida?
Elona Meço: Kam parë që keni refuzuar t’i përfshini në grupe pune.
Flamur Noka: Në të gjithë aksionin tonë kanë qenë pjesë e grupeve të punës, por kur axhenda e tyre përkon pikë për pikë me axhendën e regjimit, me këta individë do të jemi të kujdesshëm, sepse ne kemi për detyrë të përfaqësojmë votën e demokratëve. Axhenda e këtyre 3 personave, që përpiqen të mbajnë peng një pjesë të grupit, nuk ka lidhje me axhendën e PD dhe demokratëve. Ka lidhje vetëm me 1 gjë: fake opozitë duke bërë shoë në parlament, por praktikisht i shërbejnë dhe mbajnë gjallë regjimin. Megjithatë, tani jemi para zgjedhjeve lokale. Prapë thirrja jonë është afrohuni, ejani! Shmangni axhendën e pengut, vazhdoni axhendën e demokratëve, të bëhemi bashkë të mundim regjimin. Shpresojmë të ketë reflektim. Gjithmonë ka kohë për t’u kthyer në rrugën e atyre që të kanë votuar. Një akt i tillë është absolutisht i mirëpritur.
Elona Meço: Zoti Alibeaj ka treguar gatishmëri publike për të dalë me një kandidat të përbashkët të demokratëve. Ka një rrugë për të shkuar drejt kandidatëve të përbashkët?
Flamur Noka: Po, ka një rrugë. Ajo është 1. Vota! Primaret janë ato që i japin zgjidhje çdo dileme, vota e demokratëve. Kushdo që të dalë nga primaret do të ketë të gjithë mbështetjen e lidershipit të PD dhe demokratëve. Koha kur kandidatët caktoheshin nga kryetari ka marrë fund. Kryetarokracia ka vdekur. Vota e Sali Berishës si kryetar partie është e barabartë me votëm e demokratit të zakonshëm, tani së fundi edhe me atë të simpatizantit.
Elona Meço: Si mund të monitorohet procesi nga pala tjetër, kur ata nuk kanë përfaqësues në komisione?
Flamur Noka: Ka 2 rrugë në demokraci për t’u përfshirë në proces: pazari dhe vota. Ne kemi zgjedhur vetëm 1 rrugë. Vota na bashkon, vota jep verdikt. Pazare nuk ka. Demokratët në bazë janë po ata që kanë qenë, kur u zgjodhën deputet Enkelejdi, Gazi apo Jorida. Është çështje vullneti. Të shmangen nga rruga që i ka futur Edi Rama dhe të vijnë në rrugën e denokratëve, dera është e hapur. I mirëpresim!
