Në orët e para të mëngjesit të sotëm disa persona të maskuar dhe nën kërcënimin e armës kanë grabitur dhe terrorizuar një familje në fshatin Dom të Klosit.
Policia ka reaguar për ngjarjen duke zbuluar detaje të reja. Bëhet me dije se pasi kanë dhunuar dhe frikësuar nënë e bir në një banesë, grabitësit kanë vjedhur prej aty një shumë të caktuar monetare. Mësohet se grabitësit kanë lidhur fillimisht familjarët e më pas kanë kontrolluar të gjithë banesën.
“Rreth orës 03.30, datë 02.10.2022, në fshatin Dom, Klos, persona ende të paidentifikuar dyshohet nën kërcënimin e armës, janë futur në banesën e shtetases Sh.Ll, e cila ndodhej në banesë sëbashku me djalin e saj dhe me forcë ju kanë marrë një shumë të konsiderueshme vlerash monetare”, njofton policia.
Deri në këto momente policia ka shoqëruar 6 persona në Komisariat, dhe vijon kontrolli i zonës për kapjen e personave të përfshirë në këtë ngjarje.
Grupi hetimor nën drejtimin e Prokurorisë vijon punën për zbardhjen dhe dokumentimin e ngjarjes.
