Kryetari i Partisë Demokratike, Sali Berisha ka reaguar për sulmin kibernetik të Iranit ndaj Shqipërisë.
Gjatë një deklarate për mediat, Berisha e cilësoi si një akt “zuzar” të Iranit pasi çmimin më të madh për këtë sulm po e vuajnë qytetarët shqiptarë. Gjithashtu, Berisha akuzoi qeverinë e Edi Ramës për papërgjegjshmëri ndërsa vendosi gishtin e fajit ndaj patronazhistëve të cilët kanë nxjerrë të dhënat personale të qytetarëve shqiptarë.
“E konsideroj një agresion ndaj shtetit shqiptar sulmin kibernetik të ajetullahëve të Teheranit ndaj sistemeve digjitale të Shqipërisë. Në një akt zuzar, regjimi iranian ka sulmuar dhe ka devastuar sistemet digjitale të vendit, çmimin e madh për të cilin e paguajnë qytetarët në shërbime, në sigurinë e tyre, jo vetëm shqiptarët. Sulmi që nisi me portalin e Albania, kaloi në sistemin TIMS më vonë pa asnjë lidhje me portalin e Albania, dhe dje është shtrirë në sistemin e Gjendjes Civile. Dënoj me ashpërsinë më të madhe këto sulme që në një formë përfaqësojnë një dhunim të rëndë të sovranitetit, agresion në infrastrukturë për shërbimet e sigurinë e çdo vendi. Dënoj gjithashtu pa hezitim qëndrimin e papërgjegjshëm të qeverisë së Edi Ramës, i cili filloi zyrtarisht lojën kriminale me sistemet digjitale të vendit, duke nxjerrë për patronazhistët të dhënat personale në kundërshtim me Kushtetutën e ligjet të 1 milionë shqiptarëve, duke nxjerrë targat në një mbështetje të fuqishme për krimin, duke nxjerrë rrogat në një goditje të rëndë për biznesin, duke nxjerrë telefonat, kartat e ID dhe me radhë. Për të gjitha këto akte të shtrira në vite, në Shqipëri nuk ka asnjë të dënuar, asnjë të burgosur, ndonëse përbënin dhunim të rëndë të ligjeve të vendit”, tha fillimisht Berisha.
Kreu i PD-së, dënoi me forcën më të madhe tenderat korruptivë të qeverisë Rama për ndërtimin dhe mbrojtjen e këtyre sistemeve dixhitale të cilat dështuan lehtësisht.
“Dënoj me forcën më të madhe tenderat korruptivë të ndërtimit dhe mbrojtjes së këtyre sistemeve, përpjekjet për të ndërhyrë në sistemet në Kosovë kanë qenë të mëdha por mbrojtja ka qenë e shkëlqyer, sepse 200 mln euro kanë përfunduar në xhepat e baxhanakëve me shokë e nuk kanë përfunduar në teknologji mbrojtëse të sistemeve tona digjitale”, vijoi Berisha.
Gjithashtu Berisha i bëri thirrje NATO-s dhe i kërkoi ndihmë SHBA-së që me specialistët në fusha të ndryshme të ndihmojë Shqipërinë për të kapërcuyer këtë agresion ndaj sistemeve dixhitale të Shqipërisë.
“Përpjekjet për të fajësuar kompaninë amerikane janë përpjekje për të fshehur vjedhjet që kanë bërë. I bën thirrje NATO-s, SHBA, me një ekip të gjithëanshëm, me specialistë të fushave të ndryshme të ndihmojnë Shqipërinë për të kapërcyer këtë agresion duke shqyrtuar gjithë situatën e sistemeve digjitale në Shqipëri”, tha Berisha.
