Nga Boldnews.al
Qeveria trumbeton se ka nisur një plan kursimi për energjinë elektrike. Po ashtu është angazhuar të rëndojë xhepat e familjeve që aktualisht shpenzojnë më shumë se 76 mijë lekë të vjetra në muaj (pa TVSH) për këtë shërbim. Ndërkohë, institucionet vijojnë ta shpërdorojnë.
Fotografia është shkrepur në kryeqytet në zonën pranë “Pallatit me Shigjeta”. Edhe pse jemi në mesditë, me diellin që shkëlqen, ndriçimi publik qëndron ndezur, duke shpërdoruar kësisoj energjinë elektrike.
Kjo nuk është hera e parë që Bashkia e Tiranës e drejtuar nga Erion Veliaj lë ndriçimin publik ndezur ditën, në një kohë kur nga qeveria flitet për “situatë të rënduar” dhe çmime në bursë që po prekin majat. Lidhur me këtë foli në një intervistë televizive ministrja e Energjisë Belinda Balluku, mbremjen e djeshme.
Ajo preku një situatë të ngjashme, për ndriçimin publik të lënë ndezur në “Myslym Shyrr” rreth orës 6 të mëngjesit. Balluku tregoi se kishte folur me kryebashkiakun e Tiranës dhe ky i fundit i kishte shpjeguar se ato drita duan më shumë se të tjerat që të fiken. “Është çështje sensorësh”, i pat thënë Veliaj-Ballukut, sipas rrëfimit të ministres.
Më tej, Balluku tha se është në komunikim të vazhdueshëm me kryetarët e bashkive dhe nëse do konstatohen shpërdorime të tilla të energjisë elektrike, kryebashkiakët do gjobiten.
“Bashkia e Tiranës do të penalizohet si gjithë institucionet e tjera, nuk përjashtohet. Me Erionin jam gjithmonë në kontakt”, tha Balluku.
Nuk dihet nëse për rastin në fjalë, kemi të bëjmë me dritë me sensorë, që edhe nëse është kështu, do të duhet të ishte fikur deri në mesditë. Ndoshta sensorët kanë dalë jashtë funksionit dhe kryebashkiakut Veliaj do ti duhet të sajojë një tender për riparimin e tyre me qëllim kursimin e energjisë. Mbetet për t’u parë.
Mbetet për t’u parë po ashtu nëse Balluku do të gjobisë Veliajn për shpërdorim të energjisë elektrike.
Ndërkohë, poçi i Veliajt vijon ende ndezur duke ‘sfiduar’ dritën e Perëndisë.
