Kryetari i Partisë së Lirisë, Ilir Meta, në një konferencë për mediat, i bëri thirrje qeverisë që t’i përgjigjet disa pyetjeve për projektin e portit të ri të Durrësit.
Meta pyet se nëse është marrë statusi i investitorit strategjik, cila është kompania dhe sa do të jetë shuma nga buxheti i shtetit, apo do të merret borxh?
“Përmes Vasilit i ka bërë për dijeni, thirrje kryeministrit Edi Rama që të japin përgjigje brenda afateve për të gjitha këto pyetje. A është dhënë statusi i investitorit strategji? Nëse po, cilës kompani? A parashikohet si në rastin e inceneratorëve, që prona publike të lihet kolateral nga kompanitë e huaja? Cila është kosto e portit të ri tregtar dhe sa është kohëzgjatja e realizimit të ndërtimit të portit? Ndërtimi i portit të ri tregtar do të realizohet me fonde të buxhetit apo do të kërkohet një tjetër borxh prej 2 mln eurosh meqë nuk na mjaftojnë aq borxhe sa kemi? Cili është qëndrimi i BE për këtë projekt dhe a e cenon marrëveshjen e stabilizim asociimit.
Të gjitha këto pyetje dhe shumë pyetje duhet të marrin përgjigje brenda kohës së duhur.”, tha Meta.
Më pas, Meta theksoi se ky projekt vë në rrezik aspiratën europiane të vendit, pasi cënon marrëveshjen e Stabilizim Asociimit që Shqipëria ka firmosur me Bashkimin Europian.
“Partia e Lirisë është shumë e qartë në raportet me ndërkombëtarët, por investitori më strategjik mbi këtë tokë është populli i Shqipërisë. Kush hyn në aventura me një njeri të marrë që e di që është në fundin e vonuar të qeverisjes së vetë të dështuar, dhe që kërkon të lërë peng Shqipërinë edhe për 5 vjet të tjera, bën gabim që përfshihet në këtë aferë që mund të shkojë në vlerë edhe më shumë se inceneratorët. Pra 3 milionë euro për pozicionin më strategjik të Shqipërisë, në tokën e Korridorit 8. Iku koha kur punët e Shqipërisë dhe të shqiptarëve i gjykonin zyrtarë dhe burokratë që se kanë lexuar asnjë ditë marrëveshjen e Stabilizim Asociimit me BE. Vetëm rruga e transparencës së shpejtë dhe të menjëhershme mund të qetësojë këtë situatë për ndryshe Edi Rama i ka përllogaritur shumë keq pasojat e kësaj aventure të re”, tha Meta.
