Tri janë kampionatet ku mund të luajë Taulant Seferi: Turqia, Polonia ose Ukraina. Më së shumti nga këto shtete ka pasur interesim për sulmuesin, i cili me të gjitha gjasat do të largohet nga Tirana, ndërsa mbeten modalitetet e fundit. Dihet që nga Polonia dhe Turqia për Seferin ka pasur interes, ndërsa Ukraina është një treg i sapozbuluar.
Manisa FK është gati të paguajë deri në 800 mijë euro për kartonin e sulmuesit nga Kumanova. Nga Polonia bëjnë me dije se Seferi kërkohet nga Widzew Lodz që janë të gatshëm të investojnë një shumë të konsiderueshme për ta afruar në skuadër.
Vetëm para disa ditësh Halili foli gjatë me yllin e skuadrës, Taulant Seferin. Mësohet se tema e bashkëbisedimit ka qenë e ardhmja e sulmuesit. Presidenti ka kërkuar nga lojtari që të mendojë për të ardhmen, sepse mund të ketë oferta serioze në drejtim të tij dhe duhet të jetë gati për një lëvizje në një kampionat më të fortë. Sigurisht, flitet për transferim me shifra mbi 500 mijë euro që mund të marrë klubi, ashtu si edhe rroga e lojtarit.
Edhe pse nuk ka ende një emër skuadre, me shumë mundësi edhe Seferi do të largohet nga Tirana këtë verë. Klubi ka disa oferta që mund të materializohen në ditët në vazhdim. Kujtojmë se sulmuesi është nga më të paguarit te Tirana, ndërsa ishte më i miri në fushën e lojës gjatë sezonit të fundit. Futbollisti sezonin e shkuar në 43 ndeshje, koleksionoi 19 gola, 10 asiste dhe 3814 minuta. Këtu nuk llogariten ndeshjet e kombëtares shqiptare.
Tirana do të largojë yjet e saj për t’i shitur në skuadra më të mira, por vetëm pas Europës dhe me çmimet që kërkohen nga kampionët. Në njëfarë mënyre, bardheblutë duan që të luajnë me skuadrën të plotë në Europë dhe në këto kushte nuk do të lejojnë asnjë prej yjeve të ikin.
Seferi dhe lojtarët e tjerë, si Totre, edhe pse mund të kenë oferta, do të ikin nga Tirana vetëm pasi të luhen ndeshjet europiane. Tirana kërkon të mos prishë skuadrën që ka ndërtuar këtë sezon. Në këtë moment janë shumë lojtarë për të cilët ka interesim dhe mund të largohen në fund të sezonit.
