Ukraina dhe Bashkimi Evropian kanë arritur një marrëveshje të re bashkëpunimi për prodhimin e dronëve, me synimin për të kombinuar përvojën e Kievit në fushën e betejës me kapacitetin industrial dhe teknologjik të vendeve të BE-së.
Lajmi u bë i ditur nga presidentja e Komisionit Evropian, Ursula von der Leyen, gjatë një fjalimi në Kiev, me rastin e Ditës së Shtetësisë së Ukrainës.
“Ne duhet të kombinojmë pikat tona të forta. Kjo marrëveshje do të bashkojë zgjuarsinë ukrainase dhe shkallën industriale të Evropës”, deklaroi von der Leyen.
Sipas mediave të huaja, Ukraina ka zhvilluar një industri të avancuar të dronëve që prej nisjes së pushtimit të plotë rus në shkurt të vitit 2022. Gjatë luftës, vendi ka investuar ndjeshëm në zhvillimin dhe prodhimin e mjeteve ajrore pa pilot, duke e kthyer këtë sektor në një nga elementët kryesorë të mbrojtjes së saj.
Presidentja e Komisionit Evropian theksoi se përvoja që Ukraina ka fituar në përdorimin e dronëve dhe sistemeve kundër dronëve është unike dhe duhet të shfrytëzohet në dobi të të gjithë Evropës.
“Njohuritë që keni fituar se si të punoni me sistemet e dronëve dhe anti-dronëve janë vërtet unike. Duhet ta shfrytëzojmë këtë së bashku, sepse i dimë kërcënimet me të cilat përballet Evropa në këtë fushë. Kemi parë ndërhyrje dhe alarme në shumë shtete anëtare”, iu drejtua ajo presidentit ukrainas, Volodymyr Zelenskyy.
Von der Leyen shtoi se Bashkimi Evropian mund t’i ofrojë Ukrainës kapacitete të mëdha teknologjike dhe industriale, si edhe ambiente të sigurta për prodhimin e pajisjeve ushtarake.
Ndërkohë, Ukraina ka zgjeruar bashkëpunimin ndërkombëtar në këtë sektor edhe me vende të veçanta. Presidenti Volodymyr Zelenskyy nënshkroi tre marrëveshje të reja gjatë samitit të NATO-s javën e kaluar në Ankara, duke e çuar në nëntë numrin e marrëveshjeve të tilla. Marrëveshja e re me Bashkimin Evropian përfshin bashkëpunimin me shtete dhe kompani nga i gjithë blloku evropian dhe synon rritjen e prodhimit të dronëve, një teknologji që ka marrë rol kyç në luftën në Ukrainë.
