Në 7 korrik, është thirrur protesta e parë nga kreu i PD Sali Berisha.
Por a do mundet kjo datë të sjellë frymën e bashkimit tek të gjithë demokratët?
Për kryetarin e Këshillit Kombëtar në PD, Edi Paloka, i ftuar në “MCN live”, një gjë e tillë është mëse mundshme, që krahas faktit që vetëdija qytetare duhet të ngrihet për të protestuar kundër Ramës dhe regjimit të tij, do të ndikoj edhe si një test i parë për PD e bashkuar dhe deputetët e mënjanuar.
“Unë mendoj që mbase një nga efektet e kësaj proteste mund të jetë bashkimi i atyre demokratëve që kanë ngelur të pa bashkuar, pra dhe ata që janë të mënjanuar, si një test i parë i PD pas lëkundjes që pati në parti, por kjo ngelet efekti i fundit. Qëllimi parësor i protestës ka 1001 arsye se pse shqiptarët jo sot, por më 7 korrik, por të paktën prej disa vitesh, do duhej të ishin në shesh për të kërkuar largimin e kësaj qeverie.
Në fakt unë kam qenë nga ata që pavarësisht se Berisha ka qenë dakord, unë kam qenë për ta organizuar për në muajin shtator, por duket se zhvillimet e përditshme në Shqipëri, ku reagimi popullor vjen menjëherë pas një padrejtësie që i behët, p.sh., rritjet e çmimit ose çdo gjë, duket se shqiptarët e kanë të vështirë të bëjnë një reagim të tillë dhe presin gjithmonë opozitën të bëj një reagim dhe të dalë përballë protestës, por nga tjetër, jo gjithmonë mendoj se duhet të pritur që të dal opozita në ballë për të reaguar”, tha Paloka.
Për Palokën, protesta është shtyrë edhe nga ana e shoqërisë civile, dhe si e tillë ftohet të marrin pjesë të gjithë rreth saj.
Sipas tij, Alibeaj dhe grupi i tij është i paftuar, meqë loja e tyre i leverdis Ramës.
“Sot jemi vendi më i varfër në Evropë, falë Edi Ramës, këtu çdo ditë qeveria tallët me shqiptarët, dhe për fat edhe ata e kanë toleruar që të ndodh një gjë e tillë.
Me strategjinë që përdor qeveria, shohim një shkatërrim total të ekonomisë shqiptare, dhe nuk shohim asnjë reagim, pra ka mijëra arsye për të protestuar, duhet opozita të marrë rolin e saj të vërtetë, të ju prij njerëzve dhe proceseve për të rrëzuar këtë qeveri.
Korriku është muaji i nxehtë dhe për fat të keq shqiptarët e kanë treguar ne periudha të tilla që po e them në mënyrë figurative, preferojnë të rijnë në hije sesa të dalin të protestojnë edhe kur u shkelen të drejtat e tyre. Rama e din këtë fenomen dhe pikërisht në këto përudha shqiptarëve u ka bërë padrejtësitë më të mëdha, por për këtë protestë përveç Berishës, ishe edhe ajo pjesa e shoqërisë civile, e cila zhvilloi një takim me të dhe këmbënguli për protesta, sepse s’duhet te çohemi në protestë në shtator, p.sh., për çmimet që janë rritur ne qershor. Pra, kjo do të jetë protesta e parë që do të organizojë PD, si një lloj testi. Nuk kemi komunikuar me Alibeajn, dhe 2-3 të tjerët sepse mendoj se nuk e kanë interesin e opozitës, ata po bëjnë një lojë që i intereson Ramës, dhe në këtë moment ftesa është e panevojshme dhe e papërshtatshme”, shtoi ai.
