“Bastard i bllokmenëve hoxhist”, e quajti kreu i PD-së Sali Berisha kryeministrin Edi Rama, nga foltorja e Kuvendit.
Me marrjen e fjalës, Berisha denoncoi bordet e krijuara nga qeveria për caktimin e çmimeve tavan për disa produkte, duke u shprehur se ato po vjedhin qytetarët.
“Sot një bastard i bllokmenëve hoxhist e konfirmoi këtu se me këtë metodë komuniste ka gjetur shpëtimin e qytetarëve shqiptarë. Unë e denoncoj këtë platformë bordet si shushunja që po i pijnë gjakun, po i nxijnë jetën, po i fusin në depresion me çmime si askund tjetër vetëm e vetëm për të mbrojtur qeverinë dhe oligarkët e saj”, tha Berisha, duke iu referuar deklaratave të vetë Ramës, i cili po nga foltorja e parlamentit tha se bordet janë një metodë komuniste.
Akuza, Berisha lëshoi edhe për qëndrimin e Ramës gjatë takimit të djeshëm në Ohër të Ballkanit të Hapur.
“Ka humbur çdo sens realiteti, vjedhja e përorshme duket se shërben si narkotik që të shkëput nga realiteti dhe bota përreth. Shkon në Ohër, shkelmon mbi jetën sakrificat gjakun e 12 mijë shqiptarëve në Kosovë, sikur është ky padron i jetës së tyre. Po ç’të drejtë ka ky të flasë në emër të të vdekurve në Kosovë në një akt të mirëfilltë ç’njerëzor. Të krahasosh viktimat e luftës në Kosovë me luftën e dytë botërore! Po çfarë agresioni ka bërë Kosova?! Ky bën gjithçka që i thotë Vuçiçi”, tha Berisha.
Ish-kryeministri paralajmëroi protesta.“Shqipëria e tëra do ngrihet në këmbë se s’durohet më kjo që po ndodh”, tha Berisha duke e akuzuar Ramëb për vjedhje të qytetarëve.
Më herët gjatë seancës plenare, kryetari i Partisë Demokratike, Sali Berisha ka replikuar me kryeministrin Edi Rama pa mikrofon. Berisha kërkoi fjalën pasi Rama u largua nga foltorja, por kryeparlamentarja Lindita Nikolla refuzoi diçka të tillë. I menjëhershëm ishte reagimi i kryedemokratit i cili e cilësoi si një akt të turpshëm, mos dhënien e fjalës në Kuvend. Ndërsa, Rama i tha Berishës se është shpallur “non grata” dhe se është i padëshiruar. Më tej, Rama u largua nga seanca.
