Nga Boldnews.al
Anëtarja e Komisionit të Pavarur të Kualifikimit, Etleda Çiftja, vijon ende normalisht detyrën, pavarësisht se ajo prej gati dy javësh është marrë e pandehur nga Struktura e Posaçme Kundër Korrupsionit (SPAK), e akuzuar për “fasfikimit dokumentash” dhe “deklarim të rremë të pasurisë”.
Burime zyrtare nga SPAK konfirmuan për “Boldnews.al” se vendimi për Etleda Çiftjan i është njoftuar zyrtarisht institucioneve të rivlerësimit, konkretisht Komisionit të Pavarur të Kualifikimit (KPK) dhe Kolegjit të Posaçëm të Apelimit (KPA).
Faza proceduriale në të cilën gjendet komisionerja Çiftja shoqërohet me pezullimin e saj nga detyra, deri në përfundim të procesit gjyqësor.
Por, deri më tani, institucionet përgjegjëse nuk kanë ndërmarrë asnjë hap për nisjen e procedimit disiplinor ndaj anëtares së Vetingut.
Kushtetuta e Shqipërisë, në Aneksin C të saj, parashikon se procedimet disiplinore ndaj zyrtarëve të strukturave të Vetingut zhvillohen nga Kolegji i Posaçëm i Apelimit.
Ky detyrim përforcohet edhe në nenin 17 të ligjit “Për rivlerësimin kalimtar të gjyqtarëve dhe prokurorëve…” (ligji për Vetingun).
“Boldnews.al” pyeti zyrtarisht pranë Kolegjit të Apelimit në fillim të kësaj jave, nëse ishte përzgjedhur trupa disiplinore për shqyrtimin e çështjes së Etleda Çiftjas.
Deri në publikimin e këtij artikulli, nga KPA nuk është dhënë asnjë koment, megjithëse informacioni i kërkuar është shumë i thjeshtë dhe përgjigja është me variantet “Po” ose “Jo”.
Ndërkohë, edhe në faqen zyrtare të KPA-së nuk ka asnjë informacion për shqyrtimin e procedimit disiplinor ndaj komisioneres së Vetingut, Etleda Çiftja.
Vijimi i saj në detyrë, ndërkohë që është marrë e pandehur, mund të ndikojë në ligjshmërinë e vendimeve të Komisionit të Vetingut, ku pjesë është aktualisht anëtarja Çiftja.
Në fund të muajit Maj 2022, Prokuroria e Posaçme mbylli hetimet dhe mori të pandehur komisioneren e Vetingut, Etleda Çiftja, për shkelje të neneve penale që lidhen me dokumentat dhe pasurinë.
Akuzat kundër Etleda Çiftja
SPAK-u nuk ka bërë asnjë njoftim zyrtar për rastin e Etleda Çiftjas, megjithëse ka ka përfunduar hetimet dhe ka marrë të pandehur.
“Boldnews.al” ka siguruar informacione nga kallëzimi ndaj komisioneres së Vetingut, mbi të cilën është mbështetur edhe hetimi i prokurorëve specialë.
Ja çfarë ka ndodhur.
Në Korrik 2017, anëtarja e Komisionit të Pavarur të Kualifikimit, Etleda Çiftja, plotëson deklaratën fillestare të pasurisë.
Ndër të tjera, ajo deklaron se është në pronësi të një aseti tokë arë, me sipërfaqe 3440 m2 në Qerret të Kavajës, blerë në 10 Korrik 2006, me vlerë 50 mijë euro.
Për këtë pasuri, ajo deklaron si burim financiar 15 mijë euro të kursimeve nga paga si juriste në kompaninë private “Egnatia O. Albania” dhe 35 mijë euro të tjera kredi, të cilën duhet ta shlyejë për 20 vjet, deri në vitin 2026.
Deri këtu, nuk duket se ka ndonjë gjë të veçantë. Por, redaksia ka zbuluar kontratën që Etleda Çiftja e ka blerë këtë tokë në vitin 2006 dhe historia ndërlikohet shumë, në dëm të komisioneres së Vetingut.
Sipas kontratës me nr. 2138 Rep, nr. 1490 Kol, dt. 10 Korrik 2016, nënshkruar pranë noteres publike Luljeta Kongoli në Tiranë, rezulton se Etleda Çiftja e ka blerë këtë tokë për vetëm 300 mijë lekë të reja.
Pra, kontrata e vitit 2006 shënon si vlerë blerjeje 300 mijë lekë, ndërsa në deklaratën e pasurisë është shënuar vlera 50 mijë euro.
