Nga Klodian Tomorri
Marrëveshja që praktikisht e privatizon Parkun Kombëtar të Butrintit mes Ministrisë së Kulturës dhe Fondacionit përkatës është hartuar nga studio ligjore Tashko dhe Pustina. Ministria e Kulturës thotë në relacionin zyrtar se studio “Tashko dhe Pustina” e hartoi marrëveshjen sipas një kontrate sponsorizimi të lidhur në vitin 2020.
Flonja Boriçi, pronarja e studios “Tashko-Pustina” pasi hartoi marrëveshjen dhe pasi shkroi projektligjin që ja jep Butrintin fondacionit të ngritur për këtë qëllim, papritur është emëruar në Bordin e Drejtoreve të Fondacionit. Bordi ka 5 persona në përbërje dhe do të kushtoje 140 mijë dollarë në vit.
Pra zonja Boriçi, e cila bëri ligjin për t’ia kaluar parkun e Butrinit fondacionit të ngritur për ketë qellim, do të marrë 28 mije euro në vit nga fondacioni. Marshallah kontrata e sponsorizimit. Por kjo është vetëm antipasta.
Bordi emëron aparatin ekzekutiv që do të menaxhojë Parkun dhe ka vendimmarrjen kyçe në aspektin financiar. Pra këta miratojnë investimet, shpenzimet e tjera dhe mbi të gjitha do të vendosin se si do të shpenzohen të ardhurat që do të gjenerohen nga parku.
Ne planin e biznesit shkruajnë se bileta për të hyrë në Park do jetë nga 7 deri ne 11 dollarë për vizitor, por Bordi ka tagër që ta indeksoje atë sipas inflacionit. Pra ta rrisë deri në 30 përqind me shumë akoma. Para e madhe. Të kushton më lire të hysh ne muzeun e Uffizit në Firence.
Tani nëse unë bëj një ligj që kalimi në rrugën Tiranë-Durrës të behet me pagesë dhe të ardhurat të menaxhohen nga një Fondacion ku unë të jem drejtor, ma pranon qeveria këtë? Se këtë ka bërë në rastin e Butrintit.
Ka dhe disa pyetje të tjera?
1-A ka qenë studioja “Tashko dhe Pustina” studioja ligjore e inceneratorëve?
2- A ka dërguar studioja “Tashko dhe Pustina” shkresa zyrtare për ndërprerjen e kontratave tek kompanitë furnitore të inceneratorëve, në emër të këtyre të fundit?
3-A ka ankesa nga furnitorët e huaj, të cilit Klodian Zoto i ka lënë pa paguar për studion ligjore “Tashko dhe Pustina” pranë administratorit shtetëror që menaxhon sot kompaninë e sekuestruar të Klodian Zotos?
4- Dhe me e rëndësishmja. A ka qene studio ligjore “Tashko dhe Pustina” pjesë e negocimit të kontratës së inceneratorit të Tiranës me Bashkinë e Tiranës apo atyre të Fierit dhe Elbasanit me bashkitë respektive? Dhe nëse po, a do të sjellë kjo studio në Parkun e Butrintit të njëjtën eksperiencë pozitive në mbrojtjen e interesit publik ashtu si eksperienca impresionuese e inceneratorëve?
Unë i di përgjigjet e këtyre, por është qeveria që duhet të bëjë transparencë për qytetarët.
