Partia Demokratike deklaroi sot se korrupsioni ka shndërruar Shqipërinë në parajsën e pastrimit të parave.
Deputeti i PD Dashnor Sula, duke iu referuar raportit të DASH tha se ky raport e përcakton Shqipërinë edhe për vitin 2021 si një vendburim i kanabisit dhe një bazë lokale për grupet e krimit të organizuar që lëvizin drogat e paligjshme nga vendet e origjinës në tregjet evropiane.
Sipas tij, raporti vë në dukje dhe mungesën e zbatimit të ligjit ndërsa thekson se “Shqipëria duhet të zbatojë në mënyrë efektive ligjet, të ushtrojë funksione efektive mbikëqyrëse, të përmirësojë bashkëpunimin mbikëqyrës dhe ligjzbatues dhe të vazhdojë të zhvillojë kapacitetet e policisë dhe prokurorëve të saj për t’u fokusuar në korrupsionin, pastrimin e parave dhe krimet ekonomike.
Përkundër një numri të konsiderueshëm të hetimeve të pastrimit të parave në vitet e fundit, numri i ndjekjeve penale të lidhura me të, mbetet i ulët”.
