Trajneri i Argjentinës, Lionel Scaloni, ka bërë thirrje që gjysmëfinalja e Botërorit 2026 ndaj Anglisë të shihet vetëm si një sfidë sportive, duke kërkuar që të mos përzihen ngjarjet historike dhe politike me futbollin.
Argjentina dhe Anglia do të përballen këtë të mërkurë në Atlanta për një vend në finalen e Botërorit, ku tashmë pret Spanja. Megjithatë, përballja mes dy kombëtareve rikthen gjithmonë kujtimet e Luftës së Falklandeve (Malvinas) dhe duelit të famshëm të Botërorit 1986, kur Diego Maradona udhëhoqi argjentinasit drejt triumfit.
“Nuk mund t’i përziejmë këto gjëra. Ajo ishte një periudhë shumë e trishtuar në historinë tonë dhe nuk mund ta ndryshojmë. Kjo është një ndeshje futbolli dhe nuk duhet ta ngatërrojmë me të kaluarën. Ne i kujtojmë ata që humbën jetën, por askush nga ata që janë sot këtu nuk ka faj për atë që ndodhi. Do të ishte gabim t’i përzienim këto dy gjëra”, deklaroi Scaloni.
Trajneri argjentinas minimizoi edhe ndikimin e lodhjes fizike, pavarësisht se skuadra e tij ka zhvilluar dy ndeshje me kohë shtesë në fazën me eliminim direkt.
“Kur je në një gjysmëfinale Botërori, lodhja kalon në plan të dytë. Të gjithë lojtarët janë në gjendje të mirë dhe në një ndeshje të tillë nuk mund të luajë askush që nuk është 100 për qind gati”, theksoi ai.
Scaloni u shpreh krenar për rrugëtimin e ekipit të tij, por siguroi se objektivi mbetet finalja.
“Çdo lojtar e di se çfarë do të thotë të luash një gjysmëfinale Botërori. Jam plot shpresë dhe shumë mirënjohës për atë që kemi arritur. Duhet ta vlerësojmë këtë rrugëtim, por do të gjejmë forcat për të shkuar edhe një hap më tej dhe për të arritur në finale.”
Tekniku i kampionëve të botës shtoi se pret një paraqitje më të mirë nga skuadra e tij, sidomos në aspektin e kontrollit të lojës.
“Duhet të luajmë me topin, sepse aty kemi qenë gjithmonë më të fortë. Kemi dëshirën të japim gjithçka deri në sekondën e fundit dhe shpresoj që të shohim Argjentinën më të mirë në fushë.”
Scaloni nuk përjashtoi ndryshime në formacion, duke theksuar se ato do të bëhen për të goditur pikat e dobëta të Anglisë dhe për t’u mbrojtur nga cilësitë e kundërshtarit.
Në fund, ai komentoi edhe zgjedhjen e fanellës blu, me të cilën Argjentina ka fituar disa nga përballjet historike ndaj Anglisë në Botëror.
“Nuk kam pasur asnjë rol në këtë vendim dhe nuk jam supersticioz”, tha Scaloni.
Fituesi i sfidës Angli-Argjentinë do të përballet me Spanjën në finalen e madhe të së dielës, në stadiumin “New York/New Jersey”, ku Argjentina do të synojë titullin e katërt kampion bote.
