Kreu demokrat Lulzim Basha u shpreh pasditen e sotme se në 11 dhjetor nuk ka Kuvend Kombëtar të Partisë Demokratike.
Basha tha se PD është një parti që bazohet te statuti dhe statuti e ka qartë të parashikuar se kush e thërret mbledhjen e Këshillit Kombëtar.
“Kuvendi i PD do të mblidhet më 18 dhjetor. Ato që duan ta instrumentalizojnë situatën, në rastin konkret Sali Berisha për interesa personale, ne i kemi ftuar në Kuvendin e 18 dhjetorit”, tha Basha në studion e ABC.
Ai tha se vullneti i çdo demokrati duhet të finalizohet bazuar në rregullat e partisë sonë, në statutin e PD.
“Çdokush që kërkon të kontribuojë, përfshi edhe ata që mendojnë ndryshe mund të vijnë në Kuvendin e 18 dhjetorit”, tha Basha.
Sipas tij, në javët e fundit kemi një dallim të madh mes një kulture të tranzicionit, që nuk toleron mendimin ndryshe, kultura e bullizimit, që duhet të marrë fund.
“Ia kam dal të bëj diferencën, sepse mendoj se duhet të kemi një tjetër kulturë, post-tranzicionit”, tha Basha.
I pyetur lidhur me mënyrën se si janë zgjedhur Sekretarët e PD, Basha tha se kurrë s´ka pasur një garë reale zgjedhjesh.
“U shmang hipokrizia, unë shmanga gjetjen e 15 kandidaturave që do të ishin thjesht sa për të thënë se bëmë garë”, tha Basha, duke mbrojtur tezën e një votimi të hapur për emrat e votuar.
