Një denoncim për të ardhurat e familjes së Edi Ramës është bërë publik këtë të shtunë.
Zëdhënësja e Antikorrupsionit në PD, Genta Vangjeli, ka nxjerrë disa dokumenta ku tregohet se të ardhurat dhe pasuritë e familjes kryeministrore vijojnë të rriten nga viti në vit ndryshe nga çfarë deklarohet.
Ajo tregon se në deklarimin e pasurisë të dorëzuar më 31 mars 2025, (për vitin 2024), Rama ka deklaruar të ardhura në vlerën 36.7 mijë euro nga paga si Kryeministër, rreth 9.2 mijë euro më shumë se në vitin pararendës dhe të ardhura të tjera në shumën 71 mijë euro .
Ndërsa gruaja e tij Linda Rama ka deklaruar për të njëjtin vit të ardhura në shumën 90 mijë euro, ndërsa rezulton pronare e disa pasurive të paluajtshme.
Vangjeli thotë, se Linda në vitin 2024 kishte një shumë kredie me vlerë 229 mijë euro për të shlyer në lidhje me një pasuri të paluajtshme të cilën e ka shlyer po brenda vitit duke ngritur kështu pikëpyetje mbi të ardhurat dhe deklarimet që kanë bërë çifti Rama.
Deklarata e plotë:
Ndërkohë që mijëra shqiptarë vijojnë të largohen nga vendi për shkak të papunësisë, pagave të ulëta dhe pamundësisë ekonomike, pasuria e familjes kryeministrore vijon të rritet nga viti në vit.
Sipas formularit të deklarimit të pasurisë të dorëzuar më 31 mars 2025, (për vitin 2024), Kryeministri Edi Rama ka deklaruar të ardhura në vlerën 36.7 mijë euro nga paga si Kryeministër, rreth 9.2 mijë euro më shumë se në vitin pararendës dhe të ardhura të tjera në shumën 71 mijë euro .
Në total të ardhura monetare 108 mijë euro në vit ndryshe mesatarisht 9 mijë euro në muaj.
Ndërkohë, bashkëshortja e tij ka deklaruar për të njëjtin vit të ardhura në shumën 90 mijë euro, duke vijuar të shkëlqejë në tregun e pasurive të paluajtshme.
Ndërsa në vitin 2023, zonja Rama kishte blerë një pasuri të paluajtshme me vlerë 429 mijë euro, për të cilën kishte paguar 200 mijë euro, ndërsa diferencën prej 229 mijë euro kishte deklaruar se do ta shlyente brenda vitit 2024.
Në deklarimin e fundit, ajo njofton se e ka shlyer këtë totalisht këtë detyrim, falë ndihmës edhe një kredie prej 200 mijë euro, të marrë në qershor 2024.
Gjithashtu, po në të njëjtin vit ajo deklaron blerjen e një pasurie tjetër të paluajtshme me sipërfaqe 118 m², kundrejt çmimit 107 mijë euro ose 910 euro për metër katror.
Pra, vetëm për vitin 2024, shpenzimet për blerje pasurish të paluajtshme të zonjës Rama kapin vlerën 336 mijë euro.
Në përfundim, sipas vetëdeklarimeve zyrtare, bashkëshortja e Kryeministrit rezulton pronare e:
Një apartamenti me sipërfaqe 146 m²
Gjysmës së shtëpisë së banimit në Surrel, me sipërfaqe ndërtese 490 m² dhe 8390 m² tokë
Një pasurie të paluajtshme të blerë në 2023 me sipërfaqe 107.33 m²
Një pasurie të paluajtshme të blerë në 2024 me sipërfaqe 118 m²
Gjithashtu, tokë në pronësi 100% të saj me sipërfaqe totale 9570 m².
Toka në bllok blerë me 310 euro për m2 apo pasuri të paluajtshme me vlerë 910 euro për m2 janë çmime që për qytetarët e thjeshtë mbeten ëndrra në sirtar por për familjen e Kryeministrit është një pasuri e prekshme.
