Dyshime për “marrëveshje paraprake”/ Shpresa-Al fiton tenderin 150 mln lekë të Veliajt

Nga BoldNews.al

Në një tender me vlerë rreth 160 milionë lekë të vjetra, të mbyllur së fundmi nga Bashkia e Tiranës, ekzistojnë disa elementë që ngrenë dyshime se disa kompani kanë krijuar një lloj “marrëveshjeje”, për të nxjerrë në fund fituese kompaninë “Shpresa-Al”.

Në fund të Tetorit të këtij viti, administrata e drejtuar nga Erion Veliaj, shpalli rezultatet e tenderit “Blerje inerte”, me fond limit 15.8 milionë lekë të reja pa TVSH.

Në foto: Formulari i fituesit të tenderit “Blere inerte” të zhvilluar nga Bashkia Tiranë

Sipas të dhënave zyrtare, fituese e procedurës tenderuese është ‘Shpresa-Al”, e cila nuk ka paraqitur ofertën më të ulët.

Në garë kanë marrë pjesë 5 operatorë ekonomikë, nga të cilët 4 prej tyre janë skualifikuar.

Tek shkaqet e skualifikimit ngrihen dyshime për një lloj “marrëveshje paraprake”, në favor të “Shpresa-Al”.

Konkretisht, shoqëritë “Arjel” shpk, “Bami” shpk dhe “Junik” shpk kanë një të përbashkët në skualifikimin e tyre.

LEXO EDHE  Covid në Shqipëri, 4 humbje jete dhe 406 raste të reja. Ja si shpërndahen

Ato nuk kanë dorëzuar “Sigurimin e ofertës”, një prej kritereve bazë për pjesëmarrje në tender.

Në foto: Arsyet e skualifikimit të kompanive të tjera pjesëmarrëse në tender

Ligji “Për prokurimet publike” parashikon që çdo kompani konkurruese duhet të dorëzojë paraprakisht “garancinë e ofertës”, e cila është 2 përqind e fondit limit të tenderit. Në rast të kundërt, kompanitë skualifikohen automatikisht.

Në tenderin e Bashkisë së Tiranës për “Blerje Inerte”, rezulton se 3 nga konkurentët nuk e kanë dorëzuar këtë “Garanci…”, duke e pasur të qartë se ato do të skualifikoheshin menjëherë nga procedura.

Ndërsa, për operatorin e fundit në garë, “Sireta 2F”, Autoriteti Kontraktor, pra Bashkia e Tiranës, ka konstatuar se nuk plotësonte disa prej kritereve të parashikuara në dokumentat standarte të tenderit.

Pas skualifikimit të 4 operatorëve, në fund mbeti në garë vetëm “Shpresa-Al”, e cila u shpall edhe fituese e tenderit me vlerë mbi 150 milionë lekë të vjetra.