PS: “KLGJ nuk e bën dot Vetingun e gjyqtarëve”. Duhej vetëm për Sokol Sadushin

Nga Boldnews.al 

Partia Socialiste është e bindur se Këshilli i Lartë Gjyqësor nuk mund të kryejë vetingun e gjyqtarëve, për shkak të mungesës së përvojës me procesin e hetimit administrativ, siç thuhet në relacionin për zgjatjen e mandatit të anëtarëve të Komisionit të Pavarur të Kualifikimit (KPK), të publikuar këtë fundjavë në gazetën “Panorama”.

Ky argument, e disa të tjerë të një natyre më të rëndomtë, si vonesat në proceset verifikuese të KPK-së për shkak të mungesës së laptotëve për këshilltarët ligjorë që punuan nga shtëpia gjatë karantinës së “Covid-19”, përbëjnë boshtin kryesor të vendimit të maxhorancës për t’i zgjatur mandatin 12 komisionerëve të pavarur, të drejtuar nga Pamela Qirko, motra e ministres së Infrastrukturës, Belinda Balluku.

Partia Socialiste, me mbështetjen edhe të ambasadores amerikane në Tiranë, Yuri Kim, shpreson që miratimi i zgjatjes së mandateve të kryhet sa më shpejt në Parlament, duke çimentuar dyshimin mbi aftësinë e KLGJ-së për të marrë stafetën e vetingut të gjyqtarëve në Korrik 2022, sipas parashikimeve kushtetuese.

Ky mosbesim nuk është shfaqur më herët, kur Këshilli i Lartë Gjyqësor kualifikoi, në mënyrë tejet të dyshimtë, Sokol Sadushin për anëtar të Gjykatës së Lartë.

Sadushi ishte Ekspert i Nivelit të Lartë për Reformën në Drejtësi, gjatë kohës që drejtonte Shkollën e Magjistraturës.

Në korridoret e politikës dhe të drejtësisë, emri i tij përflitej si “i paracaktuar” për të qenë drejtuesi i ri i Gjykatës së Lartë.

Këto zëra u konfirmuan shumë shpejt dhe tashmë Sadushi është “kryetar në detyrë” i Gjykatës së Lartë, pas “vetingut” aspak rigoroz të kryer ndaj tij nga Këshilli i Lartë Gjyqësor, i cili ka për kompetencë rivlerësimin e kandidatëve jo-gjyqtarë për në kupolën e Drejtësisë.

Por, në atë rast, as Partia Socialiste dhe asnjë prej partnerëve ndërkombëtarë, nuk ngriti hije dyshimi mbi aftësinë apo përvojën e KLGJ-së për të kryer veting.

LEXO EDHE  Bardhi: Firmat e delegatëve të Elbasanit s'janë të delegatëve. Edhe për Fierin ka probleme

Siç ka raportuar më herët “Boldnews.al”, juristi Sokol Sadushi u kualifikua për pozicionin vakant në Gjykatën e Lartë, pa u kryer një verifikim i mirëfilltë mbi pasurinë e tij.

Këshilli i Lartë Gjyqësor u mbështet vetëm në raportin e Inspektoratit të Lartë të Deklarimit e Kontrollit të Pasurive dhe Konfliktit të Interesave (ILDKPKI), pavarësisht se ligji i jep të drejtë që të kryejë një hetim të pavarur.

Po ashtu, KLGJ u bazua mbi kriterin profesional në një raport të Shkollës së Magjistraturës, institucion i drejtuar nga vetë Sokol Sadushi në hartimin e atij raporti.

Problemet me pasurinë e Sadushit, të cilat u anashkaluan nga Këshilli i Lartë Gjyqësor, u shfaqën në procesin e rivlerësimit të bashkëshortes së tij, gjyqtares së Apelit të Tiranës, Edlira Petri, para Komisionit të Pavarur të Kualifikimit (KPK).

Petri u konfirmua në detyrë me një shumicë të thjeshtë 2-1 të anëtarëve të trupës, pasi më parë u vendos që ajo të mos mbahej përgjegjëse për problemet me pasuritë e bashkëshortit, të krijuar para lidhjes së martesës.

Megjithëse kjo “tolerancë” e Komisionit të Vetingut për Petrin nuk është aplikuar për subjekte të tjerë, gjyqtarë e prokurorë, gjithësesi ishte një dëshmi zyrtare se bashkëshorti i saj, Sokol Sadushi, kishte probleme me ligjshmërinë e pasurisë.

Komisioni i Pavarur i Kualifikimit ngriti pikëpyetje të rëndësishme mbi dy asete dhe bilancin financiar të gjyqtares Edlira Petri, pasuri të krijuara kryesisht nga bashkëshorti Sokol Sadushi.

Këto dyshime apo të dhëna nuk rezultojnë në asnjë rresht të vendimit të Këshillit të Lartë Gjyqësor për kualifikimin e Sokol Sadushit për në Gjykatën e Lartë.