GJKKO i kthen SPAK për plotësim dosjen për ish-kreun e Kushtetueses

Gjykata e Posaçme i kthen SPAK dosjen për plotësim hetimesh për ish-kreun e Gjykatës Kushtetuese, Bashkim Dedja.

Ky i fundit akuzohet nga organi i akuzës për deklarim të rremë dhe fshehje pasurie.

Sipas SPAK, Dedja nuk ka deklaruar një apartament 60 m2 në Golem,  të cilin në prill të këtij GJKKO e vuri në sekuestro.

“Qëndrimi jonë ishte për pavleshmëri të akteve dhe deklarimit të pushimit të procedimit. Qëndrimi alternativ ishte kthimi për plotësim të hetimeve, gjykata dha vendim shumë të argumentuar përsa i përket rregullshmërisë së hetimit dhe sjelljes të gjithë elementëve që duhet të plotësojnë dosjen penale pasi nuk ishin marrë në formën e duhur nga ligji” deklaroi avokati i ish-kreut të Kushtetueses.

Avokati tha se përveç apartamentit, SPAK prertendon edhe për fshehje pasurish të tjera.

“Sipas prokurorisë ishin dhe pasuri të tjera. Por bëhet fjalë për një gazoniere në Malin e Robit, nuk i kap as 2 milion lekë të reja në kohën kur është krijuar si pasuri dhe është në emër të vëllait të akuzuarit Dedja.Gjithë pasqyrimi që është bërë në Komisionit e vettingut nuk ishin  pasyruar në dosjen penale të prokurorisë”, tha avokati.

LEXO EDHE  Bushati: Nëse demokratët votojnë rikthimin e Berishës, këtë s’e pengon dot askush

GJKKO i ka lënë afat SPAK deri më 30 nëntor për të plotësuar dosjen dhe avokati i zotit Dedja ka bindjen se do të finalizohet me pushimin e akuzës për klientin e tij:

“Ishte vendim shumë ligjor dhe shumë profesional nga gjykata. E ngarkon prokurorinë të marrë provat në formën e kërkuar nga ligji. Akti i ekspertimit ku ishte mbështetur ngritja e akuzës u deklarua i papërdorshëm. Ju la një kohë deri me 30 nëntor dhe jemi të bindur që do të shkojë te pushimi i akuzës”.