Nishani: Opozita të kërkojë në Parlament ligjin për Vetingun e politikanëve

Bujar Nishani, foto nga FB e autorit

Ish-Presidenti Bujar Nishani i kërkon opozitës që të kërkojë në parlament ligjin për Vetingun e politikanëve dhe detyrimin e deputetëve dhe ministrave të bëjnë deklarimin e pasurive.

Përmes një reagimi në rrjetet sociale, Nishani shprehet se “opozita në Parlament duhet të paraqesë menjëherë 2 (dy) projekt-ligje. Ligjin për Vetingun e politikanëve dhe konfiskimin e çdo pasurie të pajustifikuar prej tyre. Ligjin për detyrimin e çdo deputeti, ministri, drejtuesi të institucioneve kushtetuese për të bërë publike deklaratën e pastërtisë së figurës marrë prej Komisionit të shqyrtimit të dosjeve të ish-Sigurimit të Shtetit”.

Ai shton se “opozita nuk i ka votat e mjaftueshme për ti miratuar e vetme ato ligje.Por opozita mundet të kondicionojë çdo angazhim të saj në legjislacionin që kërkon edhe votat e saja, vetëm pas miratimit të këtyre ligjeve prej Parlamentit”.

“Opozita mundet ti ketë në agjendën e diskutimit të saj në çdo seancë parlamentare këto ligje themelore për kurimin e demokracisë dhe shtetit ligjor në Shqipëri. Nëse opozita nuk i ndërmerr këto hapa, ajo mbetet thjesht një fasadë e shëmtuar e regjimit të masakrës elektorale”, shprehet ai.

LEXO EDHE  Kapet me emigrantë të paligjshëm në "BMW", arrestohet i riu