Kryeministri Edi Rama ka vijuar fushatën elektorale në Shkodër, ndërsa një pronar fasonerie i tha se nuk ka fuqi punëtore. Pas ankesës, Rama propozoi që të marrë punëtorë nga Bangladeshi apo Afganistani dhe se ligjin për këtë gjë, ai e ka kaluar tashmë.
“Ne kemi kaluar ligjin e ri për të huajt që është shumë i thjeshtë. Nuk ka më fare nga ato procedurat e tmerrshme.
7 ditë është procedura për të marrë punëtorë të huaj. Me këtë pagë që ke ti këtu i ke të sigurt punëtorët e huajt nga Bangladeshi nga Afganistani, nga India. I ke pronto, nuk dinë as shqip dhe nuk merren me thashetheme.
Sa të fillojnë me mësu shqip, fillo ndërroi se i futet krimbi, jo politika, jo demokracia jo më the të thashë”, tha Rama.
Edhe 10 ditë më parë i njëjti kryeministër që premtoi në mandatin e parë 300 mijë vende pune, por pas 8 vitesh në fakt bëri që të largohen nga vendi rreth 500 mijë shqiptarë, ka konfirmuar se tashmë ardhja e të huajve për të punuar në Shqipëri ka nisur. Dhe sipas Ramës, ky fenomen po ndodh pasi shqiptarët janë dembelë.
