Janë publikuar pamjet kur 18-vjeçari Arvin Fregjaj, së bashku me të atin Agron Mehmetaj, sulmuan 32-vjeçarin Vildan Këpeca brenda ambienteve të Poliklinikës së Shkodrës.
Në video shihet konflikti mes personave, ku babë e bir afrohen drejt 32-vjeçarit dhe e godasin disa herë me grushte. Pas përplasjes fizike, 18-vjeçari e rrëzon në tokë dhe nxjerr nga xhepi një mjet prerës, me të cilin e plagos.
I plagosuri u transportua menjëherë për ndihmë mjekësore dhe iu nënshtrua një ndërhyrjeje kirurgjikale.
Sipas hetimeve paraprake, konflikti ka nisur rreth orës 11:30 për motive të dobëta, dyshohet pas një debati për radhën e pritjes në poliklinikë.
Pas ngjarjes, Policia arrestoi 18-vjeçarin Arvin Fregjaj dhe babain e tij Agron Mehmetaj, të dy të dyshuar si të përfshirë në sulm.
Ata akuzohen për veprën penale “Vrasja me dashje” mbetur në tentativë, kryer në bashkëpunim, ndërsa i riu akuzohet gjithashtu për “Mbajtja pa leje e armës së ftohtë” dhe “Prishja e qetësisë publike”.
Ndërkohë, pas plagosjes së vëllait të tij, 41-vjeçari Arben Këpeca u nis me armë zjarri për të kërkuar autorin e dyshuar.
Ai u ndalua nga policia para se situata të përshkallëzohej, ndërsa pistoleta dhe municioni u sekuestruan si prova materiale.
