Ndryshimet në Reformën në Drejtësi, Braho: Nuk është momenti, SPAK i mbingarkuar

Juristi Ledio Braho u shpreh sot në një intervistë për Oranews se janë disa ligje që kanë të bëjnë me paketën e Reformën në Drejtësi që po përpiqen të ndryshohen në Kuvend.

Sipas Brahos, gjatë vitit 2020 SPAK është ngarkuar kryesisht nga OFL dhe me afera shumë të vogla.

“Janë disa ndryshime në disa ligje në paketën e Reformës në Drejtësi. Janë ligje që kërkojnë shumicë të cilësuar. Ka ndryshime në Kodin Penal, ne kodin e procedurë Civile dhe Penale, ligji për pushtetin gjyqësor. Janë një sërë ligjesh që po amendohen, kjo edhe për implementimin e problematikat e Reformës në Drejtësi. Njëri nga ligjet që po shihet ka të bëjë me kodin Penal dhe veprat e ushtrimit të korrupsionit, ku po vendosen vlera monetare mbi dhe nën. Është parë që deri më tani SPAK-u është i ngarkuar me çështje të vogla dhe me rastet e OFL-së. Gjatë vitit 2020 SPAK është ngarkuar kryesisht nga OFL dhe me afera shumë të vogla”, tha Braho.

Sipas tij, është kjo arsyeja që është parë e nevojshme që të ndryshohet vlera dhe këto çështje të kalojnë në kompetencë të prokurorive të rretheve.

“Po ashtu, ka edhe ndryshime lidhur me Gjykatën Kushtetuese, që kanë të bëjnë me emërimin e kuorumit të nevojshëm për gjyqtarët e Gjykatës Kushtetuese nga Gjykata e Lartë, të mos jetë me shumicë të cilësuar, por të thjeshtë, deri në vitin 2023. Ajo që nuk është normale në vendin tonë është se pritshmëritë e organeve të reja të drejtësisë qenkan të tilla që parashikojnë që Gjykata e Lartë të mos jetë funksionale në mënyrë të plotë deri në vitin 2023. Kjo bën që efektet e reformës në drejtësi të sjellin mungesa nga institucionet e drejtësisë. Po e njëjta gjë do të ndodhë edhe me gjykata e apelit dhe atyre të shkallës së parë”, tha juristi i njohur.

LEXO EDHE  Vrasja në Elbasan, shpallet në kërkim Kelmend Xhaferri

Braho shtoi se nuk është momenti që të bëhen ndryshime të tilla ligjore lidhur me reformën në drejtësi, pasi kërkojnë një konsensus të gjerë.

“Për mua nuk është momenti që të bëhen ndryshime të tilla ligjore, pasi kërkojnë një konsensus të gjerë. Reformat kanë ngecur në disa aspekte. Çdo qytetar që përballet me sistemin gjyqësor e provon se reforma në drejtësi ka sjellë zvarritje të proceseve gjyqësore e hetimeve, mbingarkesë të SPAK-ut dhe nuk ka sjellë realisht hetimin e peshqve të mëdhenj të politikës dhe krimit të organizuar. Sigurisht që ka nevojë për ndryshime, sepse organet e reja të drejtësisë kanë mungesë në burime njerëzore, duke e bërë të vështirë punën e tyre”, shtoi ai.,