Spektakël në “Niko Dovana”, Kukësi ndalon Teutën në limite

Katër gola, dy penallti, një gol me goditje dënimi dhe një shtyllë në minutat shtesë. Është kjo panorama e takimit të zhvilluar në stadiumin Niko Dovana në Durrës, mes Teutës dhe Kukësit.

Të dy skuadrat e mbyllën takimin me rezultatin e barabartë 2-2, pavarësisht se durrsakët ishin dy herë në avantazh.

Dejvi Bregu, në një ditë mjaft të mirë, ishte ai që shënoi golin e parë të takimit me penallti. Vlonjati u tregua i saktë dhe pjesa e parë u mbyll 1-0 në favor të Teutës, ndërsa në të dytën ishte një penallti që vendosi baraspeshën.

LEXO EDHE  E trishtë/ Ndërron jetë djali i legjendës amerikane të basketbollit

Eze nuk gaboi dhe e çoi në rrjetë, por festa zgjati vetëm dy minuta. Një goditje dënimi u kthye në gol nga Dejvi Bregu, i cili riktheu epërsinë për Teutën.

Gjithsesi Kukësi nuk u dorëzua. Katër minuta nga fundi i kohës së rregullt, Tsintsadze me kokë shënoi. Në shtesë Vila iu afrua golit të fitores, por shtylla e ndali. Emocione të shumta, por asnjë fitues.