Stuhia e shoqëruar me erë të fortë dhe reshje shiu ka shkaktuar probleme në furnizimin me energji elektrike në disa zona të qarkut të Kukësit.
Sipas OSHEE Kukës, problematikat më të theksuara janë regjistruar në Bashkinë Has, ku fshati Nikoliq dhe Njësia Administrative Fajza kanë mbetur pa energji elektrike për shkak të dëmtimeve në rrjet.
Në fshatin Nikoliq, një lis i rrëzuar nga era ka dëmtuar linjën e tensionit të mesëm, ndërsa në zona të tjera janë rrëzuar edhe shtylla të tensionit të mesëm, duke ndërprerë furnizimin me energji elektrike.
Grupet e OSHEE-së po punojnë për riparimin e defekteve dhe rikthimin e energjisë në zonat e prekura.
