Komiteti Teknik i Ekspertëve vendosi sot të mos ndryshojë masat anti-Covid, edhe pse prej disa ditësh ishte paralajmëruar vendosja e një ore të re policore, duke shtuar kufizimet, apo duke mbyllur disa nga shërbimet.
Propozimet janë bërë gjatë ditëve të fundit nga anëtarë të Komitetit Teknik edhe pse kriza ekonomike në vend duket se detyron Kryeministrin Edi Rama që të mos pranojë një kufizim në funksionimin e bizneseve, veçanërisht atyre që konsideron si me risk të lartë për përhapjen e virusit.
Por a ka lidhje mosndryshimi i masave anti-Covid me zgjedhjet?
Mira Rakacolli, zv.ministre e Shëndetësisë, thotë se masat e vendosura për parandalimin e përhapjes së koronavirusit do të vijojnë të mbeten në fuqi dhe se vendimet merren duke pasur parasysh situatën epidemiologjike dhe jo fushatën zgjedhore.
“Absolutisht nuk lidhen me zgjedhjet. Kjo sëmundje ishte ngjarje e re për të gjithë botën. Të gjithë nisemi nga shkenca epidemiologjike, nga indikatorë të ndryshëm.
Masat që janë arsyetuar se mund të jenë ndalës dhe frenues janë të ndryshme në vend të ndryshme. Shqipëria me shifrat që ka pasur mendojmë që deri tani masat kanë qenë të arsyeshme pasi janë marrë për të ruajtur shëndetin e njerëzve dhe nuk lidhen absolutisht me asnjë lloj situatë të caktuar politike”, tha Rakacolli.
