Ish-ministri Ylli Manjani ka reaguar për deklaratat e sotme të Edi Ramës kundër ambasadores së SHBA, Yuri Kim, lidhur me kandidimin në zgjedhje të personave më precedentë penalë.
Manjani shprehet se nuk është më lajm që Edi Rama kundërshton SHBA dhe BE.
Ai shton se lajm do të ishte nëse Ambasadorja e SHBA do të kundërshtonte një herë të vetme Edi Ramën, për kursin e përplasjes që kjo qeveri ka me perëndimin.
“Çfarë lajmi! “Rama kundër Yuri Kim”. Hahahahahahahahahahahahaha.
Lajm do ishte nëse Kim të kundërshtonte njëherë të vetme Ramën.
Të bënte një deklaratë të vetme për kursin e përplasjes të qeverisë me perëndimin, pa hyrë fare në punët politike në vend.
A e mbështet SHBA një qeveri antiperëndim apo jo? Kjo është pyetja që kërkon përgjigje.
Po që Rama është kundër tyre, nuk është më lajm. Gjithnjë është tallur me ta sipas qejfit. Por tashmë hapur, Ai po çon vendin drejt lindjes. Ndaj s’mund të jetë dakord me perëndimin, të cilin e shan tre herë në ditë para ose pas buke”, shkruan Manjani në rrjetet sociale.
Prej disa ditësh Ambasadorja amerikane në Tiranë, Yuri Kim, iu bën thirrje liderëve të partive politike që të kandidojnë për deputet për zgjedhjet e 25 prillit emra të pastër, pra jo të kriminalizuar.
Por thirrjeve të Kim, Kryeministri Edi Rama iu përgjigj sot kur tha se partitë nuk janë drejtori policie.
“Ne e kemi ligjin dhe e zbatojmë atë. Përgjegjësia është individuale, partitë nuk janë drejtori policie. Nëse dikush merr përsipër të shkojë para drejtësisë duke bërë deklarata të rreme, kjo është individuale. Ne shikojmë vetëm gjërat që janë në dispozicion”, tha Rama.
