A do të jetë deputet i PS-së Knut Fleckensteini i Gramoz Ruçit?

Nga Boldnews.al

Në moshë të rritur, madje disi të “tejthyer” sipas kohëmatjes së kryeministrit Rama, ish-eurodeputeti Knut Fleskestein, sot këshilltar dhe i vartës i Gramoz Ruçit, u shfaq në lidhje online për të folur rreth nismës së PS-së “Deputeti që duam”.

Në fundin e karrierës politike, ish-raportuesi i BE-së për Shqipërinë, Knuti i Rilindjes, që manipulonte të vërtetat që ishin në vendin tonë dhe në Parlamentin Evropian raportonte sipas këndvështrimit të Elisës, sot tregoi sërish që është lindur, rritur, dhe krijuar profilin politik në vendin e gabuar, në Gjermani. Parajsa e vërtetë për të është pikërisht Shqipëria, ndoshta në veçanti “Landi i Fierit”, sepse nga aty ka dale deputet idhulli i përjetshëm i Knutit, shefi në punë Gramoz Ruçi.

Ishte i mallëngjyer kur pa aty Taulant Ballën… “Përshëndetje Teuta dhe Taulant, faleminderit për ftesën. Mos nguroni që të më ftoni sërish. Se imagjinoni dot se sa inkurajuese ka qenë dhe për mua, dhe miqtë e mi, që do të shohin kaq shumë të rinj që duan të jenë pjesë e një politike të suksesshme, qoftë në fshat apo në nivel kombëtar. Besoj që të jenë si miku im në parlamentin Evropian, qëndroni të guximshëm dhe të vendosur”, tha Fleckenstein.

Me fjalën “miku im në Parlamentin Evropian” e kishte për Taulant Ballën, pasi ai është “zëri i PS-së” në Parlamentin ku bëhen politikat e Evropës. Dëshira e tij është që të “klonohen” sa më shumë Taulantë dhe Elisa në portalin “Deputeti që duam” dhe nuk ka zhgënjyer pasi të gjithë ata që kanë shprehur dëshirën për tu bërë pjesë e listës së deputetëve të PS-së, në CV-në e tyre kanë si “eksperiencë” të jashtëzakonshme sipas tyre, pjesëmarrja në projekte dhe në seminare ku flitet në ajër.

LEXO EDHE  Shkon në mbi 97 mijë numri i viktimave nga COVID-19 në Itali

Knuti mezi pret që të ftohet në ndonjë eveniment të PS-së. Ish-eurodeputeti e ka për nder të madh që në fundin e karrierës së tij politike (pasi nuk u zgjodh në Gjermani si erodeputet) kërkoi një oaz ku të shtyjë pleqërinë, por duket se është rinuar duke qëndruar pranë Rilindjes.

Knuti është një personazh politik që nën kamuflazhin e eurodeputetit mashtronte pafundësisht Parlamentin Evropian, duke raportuar se Shqipëria nën udhëheqjen e Edi Ramës kishte bërë përparime të mëdha dhe e meritonte hapjen e negociatave. Në fakt atje askush nuk e besoi Knutin, negociatat nuk u hapën dhe me gjasë nuk do të hapen për aq kohë sa Rama të drejtojë vendin.

Si shpërblim, Rilindja i dha mundësinë Knutit që të bëhej këshilltar për çështjet e integrimit pranë kryetarit të Kuvendit Gramoz Ruçi. Burimet thonë se ka ca vështirësi në komunikimin mes tyre, pasi Gramozi nuk di anglisht, gjermanisht jo e jo, por disa fjalë rusisht, ndaj Ruçi se kupton fare në artikulim, por e mirëkupton në gjestikulacione. Nuk është çudi që nëse do kishte një hapësirë sado të vogël Knuti të behej deputet në qarkun e Fierit, bashkë me Gramozin.